Samsung Buyuk Britaniyada Samsung Galaxy S25 FE smartfoni uchun yangi chegirma e’lon qildi. Bu haqda Sammobile nashri xabar bermoqda.
Kompaniyaning rasmiy onlayn do‘konida model narxi 100 funt sterlingga pasaytirildi. Aksiyaning muhim jihati shundaki, xaridor chegirmadan foydalanish uchun eski qurilmasini trade-in orqali topshirishi shart emas.
Chegirma Galaxy S25 FE’ning barcha talqinlariga taalluqli. Jumladan, 128 GB, 256 GB va 512 GB xotiraga ega versiyalar odatdagi narxidan 100 funt sterlingga arzonroq sotilmoqda. Shu bois xaridor qaysi xotira hajmini tanlashidan qat’i nazar, bir xil miqdordagi chegirmaga ega bo‘ladi.
Samsung faqat smartfon narxini kamaytirish bilan cheklanmagan. Galaxy S25 FE bilan birga ayrim Galaxy Buds quloqchinlari yoki Galaxy Watch aqlli soatlari xarid qilinganda, ularga 10 foizlik chegirma ham taqdim etilmoqda. Bu taklif Samsung ekotizimidagi bir nechta qurilmani bir vaqtda sotib olmoqchi bo‘lgan foydalanuvchilar uchun foydali bo‘lishi mumkin.
Bundan tashqari, smartfon uchun g‘ilof yoki boshqa aksessuarlar xarid qilinadigan bo‘lsa, Samsung ularni Galaxy S25 FE bilan birga sotib olishda 30 foizgacha chegirma bilan taklif qilmoqda. Shu tariqa xaridor nafaqat smartfonning o‘zidan, balki unga qo‘shimcha qurilmalar va aksessuarlardan ham tejashi mumkin.
Avvalroq «Kursiv» Samsung Galaxy S27 qanday ekrandan foydalanishi haqida yozgan edi.
