Realme kompaniyasi katta sig‘imli batareyaga ega yangi Realme P4x 4G smartfonini rasman taqdim etdi. Bu haqda Gizmochina nashri ma’lum qildi.
8000 mA/soat batareya va tezkor quvvatlash
Qurilmaning asosiy xususiyatlaridan biri 8000 mA/soat sig‘imli batareya bo‘lib, u 45 Vt quvvatdagi tezkor quvvatlashni qo‘llab-quvvatlaydi. Kompaniya ma’lumotlariga ko‘ra, smartfon uzluksiz 10 soatgacha o‘yin o‘ynash imkonini beradi.
Shuningdek, unda boshqa gadjetlarni quvvatlantirish uchun teskari quvvatlash funksiyasi ham mavjud. Qizib ketishni kamaytirish maqsadida 11 ming mm² dan ortiq maydonga ega sovutish tizimi o‘rnatilgan.
Displey va texnik imkoniyatlar
Realme P4x 4G 6,8 dyuymli LCD displey bilan jihozlangan. Ekran HD+ aniqlik, 120 Gts yangilanish chastotasi va 900 nitgacha maksimal yorqinlikni taklif etadi.
Smartfon sakkiz yadroli T7250 protsessorida ishlaydi. U LPDDR4X operativ xotira va microSD kartalarni qo‘llab-quvvatlovchi eMMC 5.1 ichki xotirasi bilan ta’minlangan.
Kamera va sun’iy intellekt
Qurilma 50 megapikselli asosiy kamera hamda 5 megapikselli old kamera bilan jihozlangan. Smartfon Android 16 operatsion tizimi asosidagi Realme UI qobig‘ida ishlaydi.
Unda Google Gemini sun’iy intellekt yordamchisi integratsiya qilingan bo‘lib, uni quvvat tugmasi orqali ishga tushirish mumkin.
Qo‘shimcha funksiyalar
Smartfonda yon tomonga o‘rnatilgan barmoq izi skaneri, IP64 darajasidagi himoya, 3,5 mm audio ulagich, Wi-Fi 5 va Bluetooth 5.2 modullari mavjud.
Bundan tashqari, qurilma ikki SIM-kartani qo‘llab-quvvatlaydi hamda sozlanadigan bildirishnoma indikatori bilan ta’minlangan.
Narxi va sotuvlar
Realme P4x 4G narxi $195 etib belgilangan. Qurilma dastlab Malayziya bozorida sotuvga chiqarildi.
Eslatib o‘tamiz, avvalroq Samsung Galaxy M47 5G qanday texnik xususiyatlar bilan taqdim etilishi haqida yozgan edik.
