GM tomonidan taqdim etilgan Chevrolet Bolt 2027 bir nechta haydash rejimlariga ega bo‘ladi. Bu haqda GMAutority nashri xabar bermoqda.
Haydash rejimlari avtomobilning multimedia tizimidagi maxsus Drive Modes ilovasi orqali tanlanadi. Har bir rejim akselerator javobi, rul boshqaruvi, tormoz hissi va boshqa tizimlar ishiga ta’sir qiladi. Bundan tashqari, haydovchi My Mode orqali o‘ziga mos individual sozlamalarni yaratishi mumkin.
Chevrolet Bolt 2027’da asosiy rejim Normal Mode hisoblanadi. Bu kundalik harakatlanish uchun mo‘ljallangan standart sozlama bo‘lib, shahar ko‘chalari va trassada qulaylik, barqarorlik hamda tejamkorlik o‘rtasidagi muvozanatni ta’minlaydi. Ushbu rejim odatiy haydashda avtomobilni silliq va oldindan taxmin qilinadigan tarzda boshqarishga yordam beradi.
Sport Mode esa avtomobilga yanada faolroq xarakter beradi. Bu rejim yoqilganda akselerator javobi tezlashadi, rul boshqaruvi esa og‘irroq va aniqroq bo‘ladi. Avtomobil komplektatsiyasiga qarab, Sport Mode adaptiv kruiz-kontrol, osma sozlamalari va elektromobil ovozini kuchaytiruvchi tizim ishiga ham ta’sir qilishi mumkin.
«Injiq» yo‘llar uchun ham rejim bor
Snow/Ice Mode sirpanchiq yo‘llarda harakatlanish uchun mo‘ljallangan. Bu rejim qor yoki muzda g‘ildiraklarning sirpanishini kamaytirish maqsadida akselerator javobini yumshatadi. Shu sababli quruq asfalt yo‘lda ushbu rejimda tezlanish odatdagidan sustroq sezilishi mumkin. Chevrolet Bolt 2027’ning barcha versiyalari old g‘ildirakdan tortuvchi tizim bilan jihozlanadi.
My Mode haydovchiga avtomobil xatti-harakatlarini shaxsiy didiga moslab sozlash imkonini beradi. Bu rejimda akselerator hissi, tormoz javobi, rul boshqaruvi va elektromotor ovozi alohida tanlanadi. Muhimi, tanlangan sozlamalar avtomobil qayta ishga tushirilgandan keyin ham saqlanib qoladi.
Avvalroq «Kursiv» Chevrolet elektromobili batareyasi tugagandan keyin qancha yurishi haqida yozgan edi.
