Nothing kompaniyasining yangi Nothing Phone (4b) smartfoni rasmiy taqdimotidan avval internetda ko‘rsatildi. Qurilmaning rasmiy namoyishi 2026-yil 7-iyul kuni bo‘lib o‘tishi kutilmoqda.
E’lon qilingan tasvirlarga ko‘ra, yangi model dizayn jihatidan avvalgi Nothing Phone (4a) va Phone (4a) Pro qurilmalarining ayrim elementlarini o‘zida mujassam etgan. Kompaniyaga xos shaffof dizayn saqlab qolingan bo‘lsa-da, bu safar shaffof ko‘rinish asosan kamera blokida qo‘llangan.
Smartfon Glyph Bar yorug‘lik paneli bilan jihozlangan. Ushbu yechim ilk bor Phone (4a) modelida qo‘llanilgan bo‘lib, oldingi avlodlarda ishlatilgan yirik Glyph Interface tizimi o‘rnini egallagan.
Smartfon ranglari
Rasmiy renderlarda qurilma ko‘k rangda namoyish etilgan. Norasmiy ma’lumotlarga ko‘ra, smartfon qora va oq ranglarda ham sotuvga chiqarilishi mumkin. Biroq, old panel dizayni hozircha sir saqlanmoqda.
Texnik xususiyatlar hali rasman tasdiqlanmagan. Shunga qaramay, Geekbench ma’lumotlar bazasida paydo bo‘lgan natijalar qurilma Qualcomm Snapdragon 6 Gen 4 protsessori, 8 GB operativ xotira va Android 16 operatsion tizimi bilan ishlashini ko‘rsatmoqda.
Sinov natijalariga ko‘ra, Nothing Phone (4b) Geekbench’da bir yadroli testda 1088 ball, ko‘p yadroli testda esa 3155 ball to‘plagan.
Avvalroq Kursiv Uzbekistan 15 santimetrdan oshmaydigan «orzu smartfoni» taqdim etilgani haqida yozgandi.
