Samsung kompaniyasi tomonidan yangi taqdim etilgan Samsung Galaxy A27 smartfoni bir qator imkoniyatlar va qulayliklarga ega. Sammobile nashri modelni tahlil qildi.
Galaxy A27 avvalgi avlodga nisbatan bir qator yangilanishlarga ega. Biroq Samsung taqdimotda aynan uchta asosiy jihatga alohida urg‘u berdi: displey, unumdorlik va Awesome Intelligence funksiyalari.
Birinchi yo‘nalish
Birinchi muhim o‘zgarish displey bilan bog‘liq. Galaxy A27 A2x seriyasida Infinity-O ekranga ega ilk model bo‘ldi. Bu yechim old kamera uchun tomchi shaklidagi kesimdan voz kechib, zamonaviyroq dizayn va kontentni ko‘rishda kamroq chalg‘ituvchi ekran tajribasini beradi.
Smartfon ingichkaroq ramkalar hisobiga ham avvalgi modelga qaraganda zamonaviyroq ko‘rinadi. Samsung fikricha, bu Galaxy A27’ni o‘rta toifadagi qurilmalar orasida vizual jihatdan jozibadorroq qiladi.
Ikkinchi yo‘nalish
Ikkinchi asosiy yangilanish unumdorlikka taalluqli. Galaxy A27 Snapdragon 6 Gen 3 chipi bilan jihozlangan. Samsung‘ga ko‘ra, ushbu platformaning yaxshilangan grafik protsessori o‘yinlar va animatsiyalarda silliqroq ishlashni ta’minlaydi.
Qurilma shuningdek tezroq xotira bilan ta’minlangan. Galaxy A27’da LPDDR5x operativ xotira va UFS 3.1 doimiy xotira ishlatilgan. Kompaniya ma’lumotiga ko‘ra, xotira tezligi Galaxy A26 bilan solishtirganda 50 foizga oshgan.
Qiziqarli jihati, Galaxy A27 Galaxy A36 bilan bir xil chipsetdan foydalanadi. Dizayn tomondan esa u Galaxy A37 modeliga yaqin ko‘rinishga ega.
Uchinchi yo‘nalish
Uchinchi asosiy yo‘nalish Awesome Intelligence funksiyalaridir. Galaxy A27’da Circle to Search funksiyasi bir nechta obyektni tanib olishni qo‘llab-quvvatlaydi. Object Eraser esa yanada aniqroq ishlashi aytilmoqda.
Shuningdek, Voice Recorder ilovasidagi Voice Transcription funksiyasi nutqni matnga aylantirish bilan birga tarjima ham qila oladi. Foydalanuvchilarga Gemini va Perplexity yordamchilaridan foydalanish imkoniyati beriladi.
Bundan tashqari, yangilangan Bixby tabiiy tilda buyruqlarni tushunishi va telefon sozlamalarini qulayroq boshqarishi mumkin. Bu Galaxy A27’ni Samsung‘ning sun’iy intellekt imkoniyatlari kengaytirilgan o‘rta toifadagi smartfonlaridan biriga aylantiradi. Samsung ma’lumotiga ko‘ra, Galaxy A27 ayrim bozorlarda 3-iyuldan sotuvga chiqadi.
Avvalroq «Kursiv» Samsung Galaxy A27 smartfoni taqdim etilgani haqida yozgan edi.
