Telegram’ning Android uchun 12.9 beta-versiyasida «hamjamiyatlar» funksiyasi sinovdan o‘tkazilmoqda. Bu funksiya bir nechta mavzuli guruh chatlarini bitta umumiy joyda birlashtirish imkonini beradi.
Yangi funksiya orqali guruh egalari yangi hamjamiyat yaratishi yoki o‘z chatlarini mavjud hamjamiyatga qo‘shishi mumkin bo‘ladi.
Hamjamiyat sozlamalarida uning nomini ko‘rsatish va rasm o‘rnatish imkoniyati bo‘ladi.
Chatlar ochiq yoki yashirin bo‘lishi mumkin
Hamjamiyat ichidagi har bir chat umumiy yoki yashirin shaklda bo‘lishi mumkin.
Umumiy chatga hamjamiyatga qo‘shilgan istalgan foydalanuvchi kira oladi. Yashirin chat esa faqat alohida taklif qilingan foydalanuvchilarga ko‘rinadi.
Bu tizim Discord’dagi umumiy va yashirin kanallarga o‘xshash tarzda ishlaydi.
Guruh qo‘shish huquqi boshqariladi
Dastlabki sozlamaga ko‘ra, hamjamiyatga o‘z guruhini qo‘shish imkoniyati barcha ishtirokchilarda bo‘ladi.
Biroq hamjamiyat egasi buni cheklashi mumkin. «Faqat administratorlar» rejimi yoqilsa, oddiy foydalanuvchilar guruh qo‘shish bo‘yicha taklif yuboradi, qarorni esa administratorlar qabul qiladi.
Guruh profilida hamjamiyat ko‘rinadi
Agar chat biror hamjamiyatga ulangan bo‘lsa, bu haqdagi ma’lumot uning profilida ko‘rsatiladi.
Shu joyda ushbu hamjamiyatga kiruvchi boshqa guruhlarga o‘tish uchun navigatsiya ham bo‘ladi.
Chatlar ro‘yxatda qanday ko‘rinadi
Dialoglar ro‘yxatida hamjamiyatga kiruvchi chatlar odatdagidek alohida ko‘rinishda qoladi.
Ammo administratorlar ularni bitta element ichida birlashtirish funksiyasini yoqishi mumkin. Bu forumlarga o‘xshaydi, lekin har bir bo‘lim alohida mustaqil chat sifatida ishlaydi.
Agar foydalanuvchi hamjamiyatga tegishli chatlardan biriga kirsa, Telegram uni shu hamjamiyat ishtirokchisi deb hisoblaydi.
Biroq foydalanuvchi avtomatik ravishda boshqa guruhlarga qo‘shib yuborilmaydi. U faqat ularni ko‘rishi va kerak bo‘lsa, qo‘shilishi mumkin.
Hozircha faqat test serverida
Hamjamiyatlar yaratish funksiyasi hozircha faqat Telegram’ning test serverida mavjud.
Ayni paytda hamjamiyatlarga faqat guruh chatlarini qo‘shish mumkin. Kod satrlarida kanallarni ham ulash imkoniyati tilga olingan, biroq bu funksiya hozircha faol emas.
Guruhni hamjamiyatga qanday qo‘shish mumkin
Beta-versiyada guruhni hamjamiyatga ulash sozlamalar sahifasi orqali amalga oshiriladi. Buning uchun «Add Group to a Community» opsiyasi javob beradi.
Funksiya qachon barcha foydalanuvchilar uchun ishga tushirilishi hozircha noma’lum.
Eslatib o‘tamiz, avvalroq Telegram messenjeri Hindistonda blokdan chiqarilgandi. Hindistonda Telegram’ga kirish 16-iyundan boshlab cheklangan edi. Bunga tibbiyot oliygohlariga kirish uchun o‘tkaziladigan milliy malaka imtihoni savollari sizib chiqishi bilan bog‘liq mojaro sabab bo‘lgan.
