Samsung kompaniyasi Galaxy S27 smartfonlarida Exynos 2700 protsessoridan foydalanish masalasini muhokama qilmoqda. Bu haqda ITHome nashri ma’lum qildi.
Exynos 2700 uchun yangi taklif
Kompaniya ichida Samsung’ning System LSI va MX bo‘linmalari o‘rtasida muzokaralar davom etmoqda. Unda System LSI o‘zining Exynos 2700 protsessorini Galaxy S27 flagmanlarida kengroq qo‘llash maqsadida MX bo‘linmasiga qulayroq tijoriy shartlarni taklif qilgan.
Qayd etilishicha, System LSI Exynos 2700 chipini amaldagi Exynos 2600 protsessoriga nisbatan arzonroq narxda yetkazib berishga tayyor. Evaziga esa kompaniya Exynos 2700 uchun buyurtmalar hajmini Exynos 2600 bilan taqqoslaganda qariyb 40 foizga oshirishni kutmoqda.
Qaysi modellarda qo‘llanishi mumkin
Muzokaralarning asosiy maqsadi Exynos protsessorini Galaxy S seriyasida saqlab qolish bilan cheklanmay, uni flagman modellarda yanada kengroq qo‘llashdan iborat. Xususan, Exynos 2700 kamida Galaxy S27 oilasining yuqori toifadagi modellaridan birida qo‘llanishi mumkin. Nomzodlar qatorida Galaxy S27 Ultra va Galaxy S27 Pro tilga olinmoqda.
Yakuniy qaror hali qabul qilinmagan
Hozircha yakuniy qaror qabul qilinmagan. Insayderning ta’kidlashicha, qaror Exynos 2700 sinovlari natijalari, yetkazib berish shartlari hamda Samsung’ning ishlab chiqarish imkoniyatlariga qarab qabul qilinadi.
Eslatib o‘tamiz, avvalroq Samsung Galaxy M47 5G qanday texnik xususiyatlar bilan taqdim etilishi haqida yozgan edik.
