SAIC Volkswagen yangi Volkswagen ID. ERA 5S gibrid sedanining interyeri aks etgan rasmiy suratlarni e’lon qildi. Bu haqda Autohome nashri xabar bermoqda.
Yangi Volkswagen ID. ERA 5S minimalistik uslubdagi salonga ega. Old panel ko‘p qatlamli arxitekturada ishlangan, havo yo‘naltirgichlari esa bitta umumiy chiziqqa birlashtirilgan. Salon uchun 256 xil rangni qo‘llab-quvvatlaydigan kontur yoritish tizimi ham nazarda tutilgan.
Texnik xususiyatlar
Avtomobil ichida ikki spisali rul, raqamli asboblar paneli, katta ekranli multimedia tizimi va smartfon uchun simsiz quvvatlash joyi mavjud. Umumiy dizayn Volkswagen’ning Xitoy bozori uchun tayyorlanayotgan yangi elektr va gibrid modellari uslubiga mos ravishda sodda, texnologik va keng ko‘rinishga ega.
ID. ERA 5S uzunligi 4836 mm, kengligi 1880 mm, balandligi 1505 mm.ni tashkil qiladi. G‘ildirak bazasi esa 2766 mm.ga teng. Tashqi ko‘rinishda sedan old qism bo‘ylab cho‘zilgan LED chiroq chizig‘i, yoritiladigan Volkswagen logotipi va bamper ichiga yashirilgan asosiy faralar bilan ajralib turadi.
Qo‘shimcha imkoniyatlar
Ishlab chiqaruvchi ma’lumotlariga ko‘ra, ID. ERA 5S Xingyun Zhixing haydovchiga yordam tizimi bilan jihozlanadi. Ushbu tizim avtomagistrallarda Highway NOA, shahar sharoitida esa City NOA funksiyalarini qo‘llab-quvvatlaydi. Bu Volkswagen uchun to‘laqonli shahar NOA avtopiloti mavjud bo‘lgan birinchi model bo‘lishi aytilmoqda.
Sedanning kuch qurilmasi 1,5 litrli benzin dvigateli va elektromotordan iborat. Benzin dvigateli 80 kVt yoki 109 ot kuchi, elektromotor esa 130 kVt yoki 177 ot kuchi ishlab chiqaradi. Avtomobil CLTC sikli bo‘yicha sof elektr rejimida 160 km yo‘l bosishi mumkin.
Eng muhim jihati, ID. ERA 5S’ning umumiy yurish zaxirasi CLTC sikli bo‘yicha 2000 km.dan oshadi. Batareya quvvati tugagan holatda e’lon qilingan o‘rtacha yonilg‘i sarfi 100 kmga 2,82 litrni tashkil qiladi. Shu sababli model uzoq masofali safarlar va yonilg‘i sarfini kamaytirishga qaratilgan gibrid sedan sifatida joylashmoqda.
Eslatib o‘tamiz, Kursiv Uzbekistan nashri Volkswagen Magotan gibrid sedani sotuvga chiqarilgani haqida yozgan edi.
