2026-yil iyun oyida ko‘chmas mulk va transport vositalari oldi-sotdisi bo‘yicha eskrou hisobvaraqlari orqali jami 34,4 mingta bitim rasmiylashtirildi. Bu haqda Markaziy bank ma’lumot berdi.
Bitimlarning yarmidan ko‘pi transport vositalariga to‘g‘ri keldi
Oy davomida rasmiylashtirilgan bitimlarning 19,2 mingtasi transport vositalari oldi-sotdisiga tegishli bo‘ldi. Bu jami bitimlarning 55,9 foizini tashkil etdi.
Ko‘chmas mulk oldi-sotdisi bo‘yicha esa 15,1 mingta bitim amalga oshirildi. Uning ulushi 44,1 foizga teng bo‘ldi. Shuningdek, 834 ta bitim ko‘rib chiqilish jarayonida ekani qayd etildi.
Eng ko‘p bitim Toshkent shahrida qayd etildi
Hududlar kesimida eng yuqori ko‘rsatkich Toshkent shahrida kuzatildi. Poytaxtda iyun oyida 9,4 mingta bitim rasmiylashtirilgan. Bu jami bitimlarning 27,3 foiziga teng.
Farg‘ona, Samarqand va Andijon ham faol hududlar qatorida
Toshkent shahridan keyingi o‘rinlarda Farg‘ona, Samarqand va Andijon viloyatlari qayd etildi. Farg‘ona viloyatida 3,5 mingta, Samarqand viloyatida qariyb 3 mingta, Andijon viloyatida esa 2,7 mingta bitim rasmiylashtirilgan.
Markaziy bank ma’lumotlariga ko‘ra, eskrou hisobvaraqlari orqali ko‘chmas mulk va transport vositalari oldi-sotdisini rasmiylashtirish jarayoni izchil davom etmoqda.
Eslatib o‘tamiz, avvalroq o‘zboshimchalik bilan egallangan yer uchastkalari hamda ularda qurilgan bino va inshootlarga bo‘lgan huquqlarni rasmiylashtirish muddati 150 kundan 50 kunga qisqartirilishi belgilangandi.
Qonunga ko‘ra, soliq qarzdorligi tushunchasi aniqlashtirildi. Endilikda qarzdorlik miqdori bazaviy hisoblash miqdorining 30 baravaridan oshmagan ko‘chmas mulk obyektlariga nisbatan huquqlarni e’tirof etish mumkin bo‘ladi.
