Amerikaning Hennessey kompaniyasi Venom F5-M Roadster nomli yangi giperkarini taqdim etdi. Bu haqda The Supercar blog nashri xabar berdi.
Kompaniya uni mexanik uzatmalar qutisi bilan jihozlangan dunyodagi eng kuchli seriyali giperkar deb atamoqda.
2031 ot kuchiga ega V8 dvigatel
Yangi model kapoti ostida 6,6 litrli, ikkita turbokompressorli Fury V8 dvigateli joylashgan bo‘lib, u 2031 ot kuchi ishlab chiqaradi. Dvigatel ilk bor 6 pog‘onali mexanik uzatmalar qutisi bilan uyg‘unlashtirilgan. Uzatmalarni almashtirish mexanizmi ochiq konstruksiyada ishlangan bo‘lib, avtomobilga klassik sport avtomobillari ruhini bag‘ishlaydi.
Takomillashtirilgan konstruksiya va ilg‘or boshqaruv tizimlari
Venom F5-M Roadster kompaniyaning Venom F5 Evolution modeli asosida yaratilgan. U takomillashtirilgan aerodinamika, faol osma tizimi, qayta sozlangan shassi hamda yengil karbon monokok konstruksiyasiga ega. Avtomobil yechiladigan tomga ega rodster kuzovida ishlab chiqilgan.
2031 ot kuchini samarali boshqarish uchun giperkar zamonaviy tortish kuchini nazorat qilish tizimi va elektron dvigatel boshqaruvi bilan jihozlangan. Bu tizimlar yuqori quvvatni xavfsiz va samarali uzatishga yordam beradi.
Atigi 12 dona ishlab chiqariladi
Venom F5-M Roadster juda cheklangan miqdorda ishlab chiqariladi. Atigi 12 dona avtomobil yig‘iladi va ularning har biri xaridorning shaxsiy istaklari asosida individual tarzda tayyorlanadi.
Yangi giperkarning ilk namoyishi 9 – 12-iyul kunlari Buyuk Britaniyada bo‘lib o‘tadigan Goodwood Festival of Speed festivalida bo‘lib o‘tadi.
Avvalroq Kursiv Uzbekistan Chevrolet Spark elektromobili rasman sotuvga chiqqani haqida yozgandi.
