Isroil hukumati bosib olingan G‘arbiy sohilda 34 ta yangi aholi punktlarini barpo etish uchun $434 mln mablag‘ ajratishni ma’qulladi. Bu haqda Reuters agentligi ma’lum qildi.
Xavfsizlik kabineti qarorni tasdiqladi
Isroil moliya vaziri Bezalel Smotrichning ma’lum qilishicha, mamlakat xavfsizlik kabineti G‘arbiy sohilda 34 ta yangi aholi punkti tashkil etish uchun $434 mln miqdoridagi budjetni tasdiqlagan. Uning aytishicha, yangi aholi punktlariga olib boruvchi yo‘llarni qurish uchun yana $358 mln ajratilishi rejalashtirilgan.
Smotrichning ta’kidlashicha, mazkur loyihalar amalga oshirilgach, uning to‘rt yillik faoliyati davomida tashkil etilgan aholi punktlari soni 103 taga yetadi.
Xalqaro hamjamiyatning pozitsiyasi
BMT organlari, Falastin tomoni va dunyoning aksariyat davlatlari G‘arbiy sohildagi Isroil aholi punktlarini xalqaro konvensiyalarga zid deb hisoblaydi hamda ularni tinchlik o‘rnatish yo‘lidagi asosiy to‘siqlardan biri sifatida baholaydi. Isroil esa bu pozitsiyaga qo‘shilmaydi va mazkur hududni bahsli hudud deb hisoblashini bildiradi.
Hududdagi vaziyat keskinligicha qolmoqda
So‘nggi oylarda G‘arbiy sohilda yahudiy ko‘chmanchilar tomonidan falastinliklar va ularning mol-mulkiga nisbatan zo‘ravonlik holatlari ko‘paygani qayd etilmoqda.
Ma’lumotlarga ko‘ra, hozirda G‘arbiy sohil va Sharqiy Quddusda qariyb 700 ming nafar isroillik ko‘chmanchi, ular bilan birga esa 2,7 mlnga yaqin falastinlik istiqomat qiladi.
