General Motors Specialty Vehicles Avstraliya va Yangi Zelandiya bozorlari uchun yangilangan 2026-yilgi Chevrolet Silverado 1500 pikapini taqdim etdi. GM Authority yozishicha, modelning ruxsat etilgan umumiy massasi oshirildi, bu esa yuk ko‘tarish imkoniyatini yaxshiladi.
Umumiy massa 3505 kilogrammgacha oshirildi
Yangilangan Silverado 1500’da sertifikatlash toifasi o‘zgartirildi. Shu sababli avtomobilning ruxsat etilgan umumiy massasi 3300 kilogrammdan 3505 kilogrammgacha oshdi.
Bu o‘zgarish pikapning yuk ko‘tarish imkoniyatiga ham ta’sir qildi. Silverado LTZ Premium endi 942 kilogrammgacha, ZR2 versiyasi esa 922 kilogrammgacha yuk ko‘tara oladi.
Pikap tortish va og‘ir ishlar uchun kuchaytirildi
GM Australia and New Zealand rahbari Jess Balaning aytishicha, Silverado xaridorlar orasida V8 dvigateli, tortish imkoniyati, qulay saloni va off-road qobiliyati bilan tanilgan.
2026-yilgi yangilanish aynan yuk tashish, sayohat va og‘ir sharoitda ishlashga mo‘ljallangan imkoniyatlarni kuchaytiradi.
Qora dizayn elementlari qo‘shildi
Avstraliya va Yangi Zelandiya uchun mo‘ljallangan Silverado 1500 modellari mahalliy sharoitda o‘ng rulli versiyaga qayta yig‘iladi.
Yangilanish doirasida LTZ Premium versiyasi qora emblema to‘plamini oladi. ZR2’da esa orqa bortdagi qora Chevrolet yozuvi standart jihozga aylanadi.
LTZ versiyasining osma tizimi ham oshirilgan yuk ko‘tarish imkoniyatiga moslab qayta sozlangan.
Sotuv avgustda boshlanadi
Yangilangan 2026-yilgi Chevrolet Silverado 1500 Avstraliya va Yangi Zelandiyada GMSV rasmiy dilerlari orqali avgust oyining birinchi yarmidan sotila boshlaydi.
Avtomobillar Viktoriyadagi Dandenong zavodida qayta yig‘iladi.
Yangilanishdan keyin har ikki komplektatsiya narxi 1000 Avstraliya dollariga oshadi. Silverado LTZ Premium narxi 135,9 ming Avstraliya dollaridan, ya’ni taxminan $94,9 mingdan boshlanadi. Silverado ZR2 esa 147,5 ming Avstraliya dollari, bu qariyb $102,9 ming degani.
Eslatib o‘tamiz, avvalroq Chevrolet yana ikkita modeli uchun buyurtma tartibiga o‘zgarishlar kiritgandi. Chevrolet 2027-yilgi Tahoe va Suburban Z71 komplektatsiyasi uchun buyurtma tartibiga bir qator kichik o‘zgarishlar kiritmoqda. GM Authorityga ko‘ra, asosiy yangiliklar orqa o‘rindiq media tizimi, g‘ildirak disklari, qora kuzgu qoplamalari va salon himoya aksessuarlariga tegishli.
