Sog‘liqni saqlash vazirligi 2026/2027-o‘quv yili uchun klinik ordinatura (rezidentura)ga qabul boshlanganini e’lon qildi. Bu haqda vazirlik rasmiy sahifasida ma’lum qildi.
Hujjatlar 2026-yil 20-avgust soat 23:59 ga qadar qabul qilinadi.
Hujjatlar faqat elektron shaklda topshiriladi
Nomzodlar hujjatlarini faqat medtoifa.ssv.uz axborot tizimi orqali elektron shaklda topshirishi mumkin. Har bir talabgor bitta qabul mavsumida faqat 1 ta ta’lim muassasasi va 1 ta mutaxassislikni tanlash huquqiga ega.
Test sinovlari 25 – 30-avgust kunlari o‘tkaziladi
Kirish testlari 25 – 30-avgust kunlari Tibbiyot va farmatsevtika xodimlarining malakasini baholash markazi tasdiqlagan jadval asosida tashkil etiladi.
Qabul natijalari sentabrda e’lon qilinadi
Qabul yakunlari e’lon qilinib, o‘qishga qabul qilish bo‘yicha buyruqlar 2026-yil 10-sentabrga qadar rasmiylashtiriladi.
Qaysi hujjatlar talab etiladi
Elektron tizimga shaxsni tasdiqlovchi hujjat, oliy tibbiy ma’lumot diplomi va uning ilovasi, shuningdek, amaldagi normativ-huquqiy hujjatlarda belgilangan boshqa zarur hujjatlar yuklanishi lozim.
Avvalroq Kursiv Uzbekistan davlat stipendiyalari uchun 776 ta kvota tasdiqlangani haqida yozgandi.
