FIFA AQSh, Kanada va Meksikada o‘tkazilgan 2026-yilgi jahon chempionatidan rekord darajadagi $15 mlrd daromad olganini e’lon qilishga tayyorlanmoqda. Bu haqda The Guardian nashri xabar berdi.
Tashkilot turnir boshlanishidan avval $11 mlrd daromad olishni rejalashtirgan edi. Yakuniy ko‘rsatkich dastlabki prognozdan $4 mlrdga yoki qariyb 36 foizga yuqori bo‘lishi kutilmoqda. Daromadning funt sterlingdagi qiymati taxminan 11,2 mlrd funtni tashkil etadi.
FIFA prezidenti Janni Infantino 18-iyul kuni tashkilotga a’zo futbol assotsiatsiyalarini daromadning sezilarli darajada oshgani haqida xabardor qilgan. Manbalarga ko‘ra, rekord tushumga qimmat VIP va mehmondo‘stlik paketlari hamda chiptalarning ikkilamchi bozordagi savdosi katta hissa qo‘shgan.
FIFA ikkilamchi bozorda sotilgan har bir chipta bo‘yicha xaridordan 15 foiz, sotuvchidan esa yana 15 foiz komissiya undiradi. Shu tariqa tashkilot bitta chipta qayta sotilganida uning narxidan jami 30 foizgacha tushum olishi mumkin.
Jahon chempionati finali oldidan ham yuqori narxdagi paketlar sotuvda qolgan. Nyu-Jersida o‘tkazilgan Ispaniya va Argentina o‘rtasidagi final uchun «Trophy Lounge» VIP paketi bir kishi uchun 34,5 ming dollardan taklif qilingan.
Eslatib o‘tamiz, Kursiv Uzbekistan nashri Shomurodovning goli JCh – 2026 ning eng chiroyli gollari ro‘yxatiga kiritilgani haqida yozgan edi.
