Samsung Galaxy S26 Ultra smartfoni va avvalgi Galaxy S25 Ultra modeli bir xil — 5 000 mA/soat sig‘imli batareya bilan jihozlangan. Sammobile nashri tafsilotlarni o‘rgandi.
Yangi model kundalik foydalanishda yaxshiroq avtonomlik va tezroq quvvatlanishni taklif qiladi. Bunga akkumulyator hajmining oshirilishi emas, balki 60 vattli simli quvvatlash, 25 vattli simsiz quvvatlash, energiya tejamkor protsessor va takomillashtirilgan sovitish tizimi orqali erishilgan.
Galaxy S26 Ultra Super Fast Charging 3.0 texnologiyasi orqali 60 vattgacha simli quvvatlashni qo‘llab-quvvatlaydi. Taqqoslash uchun, Galaxy S25 Ultra’da maksimal quvvat 45 vatt bilan cheklangan edi.
Samsung ma’lumotiga ko‘ra, mos quvvatlagichdan foydalanilganda yangi smartfon batareyasini 30 daqiqada taxminan 75 foizgacha to‘ldirish mumkin. Bu qisqa tanaffus davomida qurilmani kunning qolgan qismiga yetadigan darajada quvvatlab olish imkonini beradi.
Yana nimalar bor
Simsiz quvvatlash tezligi ham sezilarli oshirilgan. Galaxy S26 Ultra 25 vattli Super Fast Wireless Charging texnologiyasini qo‘llab-quvvatlaydi, Galaxy S25 Ultra’da esa bu ko‘rsatkich 15 vattni tashkil etgan. Yangi model batareyasini mos simsiz qurilma orqali qariyb 33 daqiqada 50 foizgacha quvvatlash mumkin. Shu tariqa simsiz quvvatlash faqat tun davomida foydalaniladigan qulaylik emas, balki kun ichida tezkor quvvat to‘ldirish vositasiga ham aylanadi.
To‘liq 25 vattli tezlikka erishish uchun Samsung‘ning mos simsiz quvvatlagichi talab etiladi. Galaxy S26 Ultra korpusida o‘rnatilgan magnitlar mavjud emasligi sababli, magnitli quvvatlagichni to‘g‘ri joylashtirish uchun Qi2 standartini qo‘llab-quvvatlaydigan maxsus g‘ilofdan foydalanish kerak. Simli va simsiz tezkor quvvatlagichlar smartfon to‘plamiga kirmaydi va alohida sotiladi.
Galaxy S26 Ultra’ning avtonomligini yaxshilovchi asosiy omillardan yana biri Snapdragon 8 Elite Gen 5 for Galaxy protsessoridir. Chip 3 nanometrli texnologik jarayon asosida ishlab chiqarilgan. Tranzistorlarning zichroq joylashuvi protsessorga kamroq energiya sarflagan holda ko‘proq hisoblash vazifalarini bajarish imkonini beradi.
Nimalar maqtovga loyiq
Samsung smartfonning sovitish tizimini ham takomillashtirgan. Galaxy S26 Ultra Galaxy S Ultra turkumidagi eng katta bug‘ kamerasi bilan jihozlangan. Ishlab chiqaruvchi ma’lumotiga ko‘ra, yangi tizim Galaxy S25 Ultra bilan taqqoslaganda issiqlikni 21 foizgacha samaraliroq tarqatadi.
Yaxshilangan issiqlik boshqaruvi uzoq vaqt o‘yin o‘ynash, yuqori aniqlikdagi videolarni yozib olish yoki og‘ir dasturlar bilan ishlash vaqtida protsessorning qizib ketishini kamaytiradi. Bu smartfonning unumdorligini barqaror saqlashga va energiya sarfini nazorat qilishga yordam beradi.
Samsung izohiga ko‘ra, Galaxy S26 Ultra batareyasining odatiy sig‘imi 5 000 mA/soat deb ko‘rsatilgan bo‘lsa-da, uning minimal nominal sig‘imi 4 855 mA/soatni tashkil etadi. Umuman olganda, Galaxy S26 Ultra katta akkumulyator emas, balki mavjud batareya imkoniyatlaridan samaraliroq foydalanish hisobiga Galaxy S25 Ultra’dan yaxshiroq kundalik tajriba taklif qiladi.
Eslatib o‘tamiz, Kursiv Uzbekistan nashri Samsung Galaxy A56, A35 va A25’da 57 ta zaiflik yopilgani haqida yozgan edi.
