Samsung kompaniyasi Samsung Galaxy A56 smartfoni uchun One UI 8.5 asosidagi iyul dasturiy yangilanishini tarqatishni boshladi. Yangilanish A566SKSS8CZG2, A566SSKC8CZG2 va A566SKSS8CZG2 yig‘ilma raqamlari bilan chiqarilgan.
Yangilanish tarkibiga Android operatsion tizimining iyul xavfsizlik paketi kiritilgan. U aniqlangan zaifliklarni bartaraf etish, qurilma ishlashidagi barqarorlikni oshirish hamda avvalgi versiyalarda kuzatilgan ayrim xatolarni tuzatishga qaratilgan.
Yangilanish hozircha faqat Janubiy Koreyadagi Galaxy A56 foydalanuvchilari uchun taqdim etilmoqda. Samsung yaqin vaqt ichida uning boshqa mamlakatlar va hududlarda ham tarqatilishini boshlashi kutilmoqda.
Foydalanuvchilar yangilanish mavjudligini smartfon sozlamalaridagi dasturiy ta’minotni yangilash bo‘limi orqali tekshirishi mumkin. Yangilanishning hajmi va ayrim funksiyalari qurilma versiyasi hamda sotuv hududiga qarab farq qilishi mumkin.
Smartfon haqida
Samsung Galaxy A56 5G kompaniyaning o‘rta narx segmentiga mo‘ljallangan smartfoni bo‘lib, 6,7 dyuymli FHD+ Super AMOLED displey bilan jihozlangan. Ekran 1080 × 2340 piksel aniqlik, 120 Hz yangilanish chastotasi va yuqori yorqinlik rejimida 1200 nitgacha yorqinlikni qo‘llab-quvvatlaydi. Stereo dinamiklar video tomosha qilish, musiqa tinglash va mobil o‘yinlarda kengroq ovoz effektini ta’minlaydi.
Smartfon Samsung tomonidan ishlab chiqilgan sakkiz yadroli Exynos 1580 protsessorida ishlaydi. Chip yadrolarining maksimal chastotasi 2,9 GGsga yetadi. Qurilmada uzoq vaqt o‘yin o‘ynash yoki bir nechta ilovani bir paytda ishlatishda haroratni nazorat qilish uchun avvalgi avlodga nisbatan kattalashtirilgan bug‘ kamerasi qo‘llangan. Model bozorlarga qarab 8 GB tezkor xotira hamda 128 yoki 256 GB ichki xotira bilan taklif qilinadi.
Avvalroq Kursiv Uzbekistan Samsung Galaxy S27 va S27 Plus kamerasi ma’lum bo‘lgani haqida yozgan edi.
