Kris Evans sakkiz yil davomida Stiv Rojers — Kapitan Amerika roliga qaytish bo‘yicha kamida o‘nlab takliflarni rad etganini aytdi. Aktyorni faqat 2026-yil 18-dekabrda chiqishi rejalashtirilgan «Qasoskorlar: Doktor Dum» filmi g‘oyasi ishontira olgan.
Evans personaj merosini asrashni istagan
Kris Evans Entertainment Weekly nashriga bergan intervyusida Marvel’dan Kapitan Amerika roliga qaytish bo‘yicha ko‘plab takliflar olganini aytdi.
Uning so‘zlariga ko‘ra, sakkiz yil ichida kamida o‘nlab taqdimotlarni eshitgan, biroq har safar rozi bo‘lmagan. Evans barcha takliflar yaxshi bo‘lganini, ammo ularda nimadir yetishmaganini ta’kidladi.
Aktyor Stiv Rojers merosini ehtiyot qilishni istagan va shunchaki qisqa yoki oddiy epizod uchun qaytishni xohlamagan.
Vaziyat Robert Dauni-kichik haqidagi xabardan keyin o‘zgargan
Evansning fikri Robert Dauni-kichik Marvel koinotiga qaytishi mumkinligi haqidagi xabarlardan keyin o‘zgargan.
Aktyorning agentlari unga Dauni-kichik Marvel bilan muzokara olib borayotganini ma’lum qilgan. Shundan so‘ng rejissyor Jo Russo Evansga «Doktor Dum» filmi konsepsiyasini shaxsan tushuntirgan.
Dauni-kichik Doktor Dum rolini ijro etadi
Yangi filmda Robert Dauni-kichik bosh antagonist — Doktor Dum obrazida ko‘rinadi.
Evans esa aynan shu loyiha Stiv Rojersni qaytarishga arziydigan hikoya ekanini tushunganini aytdi.
Kapitan Amerika yana paydo bo‘lishi mumkin
Kris Evans kelajakda Kapitan Amerika sifatida yana ko‘rinish ehtimolini butunlay inkor etmadi. Biroq u faqat kuchli ssenariy va personajga mos hikoya bo‘lsa, bu rolga qaytishga tayyorligini bildirdi.
Eslatib o‘tamiz, avvalroq Marvel Entertainment «Qasoskorlar: Qiyomat kuni» (Avengers: Doomsday) filmining ilk rasmiy treylerini taqdim etgandi. Yangi filmda Qasoskorlar, Fantastik to‘rtlik, Momaqaldiroqlar (Thunderbolts), Yangi Qasoskorlar va X-Odamlar ilk bor birgalikda Doktor Dumga qarshi kurash olib boradi.
