Apple kelajakdagi iPhone 18 seriyasi uchun OLED displeylarni arzonroq narxda xarid qilishga urinmoqda. Soha manbalariga ko‘ra, kompaniya iPhone 18 Pro Max ekranining har bir donasi uchun qariyb $70 to‘lashni rejalashtirmoqda.
Avvalgi avlodlarda ham yangi iPhone chiqarilishi bilan OLED panellar narxi pasayib borgan. Yetkazib berish muddati va shartlariga qarab, iPhone 16 Pro Max displeylarining narxi ayrim hollarda $100 dan oshgan. iPhone 17 Pro Max uchun mo‘ljallangan panellar esa qariyb $80 gacha arzonlashgan.
Model qanday materialda chiqadi
iPhone 18 ekranlari ilk bor M16 organik materiallar majmuasi asosida ishlab chiqarilishi kutilmoqda. Yangi texnologiya displeyning yorqinligini oshirish, xizmat muddatini uzaytirish va ranglarni aniqroq namoyish etish imkonini beradi.
Biroq M16 materiallaridan foydalanish Samsung Display va LG Display kompaniyalaridan ishlab chiqarish jarayonlarini qayta sozlash hamda sifat talablariga javob beradigan panellar ulushini oshirishni talab qiladi. Ishlab chiqarish murakkablashayotganiga qaramay, Apple yetkazib beruvchilardan narxlarni yanada pasaytirishni so‘ramoqda.
Sabablar qanday
Bunga xotira mikrosxemalari narxining keskin oshgani asosiy sabablardan biri sifatida ko‘rsatilmoqda. Xotira komponentlarining qimmatlashuvi yangi iPhone’larning tannarxini oshirayotgani sababli Apple displey va kameralar kabi boshqa qismlarga sarflanadigan xarajatlarni kamaytirishga harakat qilmoqda.
UBI Research hisob-kitoblariga ko‘ra, Samsung Display joriy yilda Apple’ga iPhone 18 seriyasi uchun qariyb 46 mln dona OLED panel yetkazib beradi. LG Display hissasiga esa 41 mln donadan ortiq ekran to‘g‘ri kelishi mumkin.
Har ikki kompaniya vakillari smartfon ishlab chiqaruvchilari yetkazib beruvchilarga bosimni kuchaytirib, komponentlar narxini tushirishni talab qilayotganini tasdiqlagan. Apple bu borada hozircha rasmiy izoh bermadi.
Avvalroq «Kursiv» nashri Samsung Galaxy S25 smartfonining narxi pasaygani haqida yozgan edi.
