AQSh avtomobil bozorida narxi 22 ming dollardan boshlanadigan yangi mashinalar soni tobora kamayib bormoqda. You Tube’dagi Car Confections jamoasi yangi Chevrolet Tracker avtomobili bilan bir haftalik sinov testini o‘tkazishdi.
Arzon narx tashqi ko‘rinishga ta’sir qilmagan
Chevrolet Tracker zamonaviy va nisbatan agressiv dizaynga ega. Modelning LT, Activ va RS kabi turli versiyalari mavjud bo‘lib, ayrim komplektatsiyalarda qora radiator panjarasi, qora Chevrolet belgisi, yaltiroq qora disklar va kuzovning boshqa qoraytirilgan elementlari taklif etiladi.
Sinovdan o‘tkazilgan LT Midnight Edition versiyasi 17 dyuymli qora yengil qotishmali disklar bilan jihozlangan. Yuqori 2RS talqinida esa disklar o‘lchami 19 dyuymgacha yetadi. Barcha versiyalarda kunduzgi chiroqlar va proyektorli LED faralar standart jihoz sifatida beriladi. Orqa chiroqlar esa LED emas, oddiy cho‘g‘lanma lampalardan foydalanadi.
Avtomobilning uzunligi qariyb 4,52 metrni tashkil etadi. Bu avvalgi avloddan taxminan 28 santimetr uzunroq bo‘lib, Tracker o‘zidan qimmatroq Chevrolet Trailblazer’dan ham kattaroq. Katta o‘lcham avtomobilga nafaqat salobatli ko‘rinish, balki keng salon va sig‘imli bagaj bo‘limini ham ta’minlagan. Biroq model faqat old g‘ildirakdan tortish tizimida taklif qilinadi, to‘liq uzatma mavjud emas.
Salon kengligi kutilganidan yuqori
Tracker salonida qimmat materiallar ko‘p emas. Eshiklarning yuqori qismi va ayrim panellar qattiq plastmassadan ishlangan. Shunga qaramay, turli teksturalar, kumushrang bezaklar va rangli choklar salonni haddan tashqari sodda ko‘rinishdan saqlaydi.
Boshlang‘ich versiyada matoli o‘rindiqlar o‘rnatiladi. LT komplektatsiyasida mato va sun’iy charm birlashtirilgan, Activ va 2RS versiyalarida esa to‘liq sun’iy charm qoplama mavjud. O‘rindiqlar qulay deb baholangan, biroq elektr sozlash faqat ayrim yuqori komplektatsiyalarda taklif qilinadi.
LT va undan yuqori versiyalarda 8 dyuymli raqamli asboblar paneli hamda 11 dyuymli multimedia ekrani mavjud. Tizim Apple CarPlay va Android Auto’ni qo‘llab-quvvatlaydi. Multimedia imkoniyatlari juda keng emas, biroq asosiy funksiyalar sodda va barqaror ishlaydi. Isitiladigan old o‘rindiqlar, rul isitkich, simsiz quvvatlash va lyuk qo‘shimcha paketlar tarkibida beriladi.
Orqa qatorda oyoqlar va bosh uchun qariyb 97 santimetr joy mavjud. Pol deyarli tekis bo‘lgani sabab o‘rtada o‘tiradigan yo‘lovchi uchun ham noqulaylik kamroq. Orqa o‘rindiqlar suyanchig‘i sozlanmaydi va markaziy tirsak tayanchi yo‘q, biroq umumiy joy hajmi ushbu segmentdagi ko‘plab raqiblardan yaxshiroq.
Bagaj hajmi kattaroq krossoverlarga yaqin
Chevrolet Tracker’ning kuchli tomonlaridan biri bagaj bo‘limidir. Ikkinchi qator o‘rindiqlari ochiq holatda uning hajmi taxminan 708 litrni, o‘rindiqlar yig‘ilganda esa 1 529 litrni tashkil qiladi. Bu natija ayrim qimmatroq va kattaroq krossoverlar ko‘rsatkichiga yaqin.
Orqa o‘rindiqlar 60:40 nisbatda yig‘iladi. Ular buklanganda yuk maydonining uzunligi old o‘rindiqlar holatiga qarab qariyb 1,8 metrga yetadi. Bagaj kengligi taxminan 99 santimetr, balandligi 69 santimetr atrofida. Yuklash balandligi ham nisbatan past bo‘lib, og‘ir buyumlarni joylashtirishni osonlashtiradi.
Bagaj eshigi barcha versiyalarda qo‘lda ochiladi, elektr yuritma taklif qilinmaydi. Biroq pol ostida zaxira g‘ildirak mavjudligi ushbu narx toifasidagi avtomobillar uchun muhim ustunlik hisoblanadi. Shuningdek, bagajning yon tomonida kichik qo‘shimcha saqlash joyi ham bor.
Salon bo‘ylab telefon, ichimlik va mayda buyumlar uchun yetarlicha bo‘limlar ajratilgan. Markaziy tirsak tayanchi ostidagi quti segment mezonlari bo‘yicha sig‘imli, old qismda esa ikkita stakan ushlagichi va katta ochiq bo‘lim mavjud.
1,2 litrli motor kundalik harakat uchun yetarli
Tracker faqat bitta kuch qurilmasi bilan taklif qilinadi. Bu 1,2 litrli, uch silindrli turbomotor bo‘lib, 137 ot kuchi va taxminan 219 Nm aylanish momentini ishlab chiqaradi. Dvigatel olti pog‘onali klassik avtomatik uzatmalar qutisi bilan birga ishlaydi.
Qog‘ozdagi ko‘rsatkichlar unchalik yuqori ko‘rinmasa-da, motorning aylanish momenti past tezliklarda yetarli tortishni ta’minlaydi. Avtomobil joyidan tez qo‘zg‘aladi va shahar ichidagi kundalik harakatda sust taassurot qoldirmaydi. Soatiga 96 kilometr tezlikka chiqish uchun taxminan 8,8 soniya talab qilinadi. Bu ayrim qimmatroq raqiblardan, jumladan, Honda HR-V’dan tezroq.
Olti pog‘onali avtomat ravon ishlaydi va ko‘plab raqiblarda qo‘llanadigan variatorga nisbatan odatiyroq boshqaruv hissini beradi. Osma tizimi, ayniqsa 17 dyuymli disklar bilan, yo‘l notekisliklarini yaxshi yumshatadi. 19 dyuymli g‘ildiraklarda yurish qattiqroq bo‘lishi mumkin.
Boshqaruv yengil va aniq, kuzovning burilishdagi og‘ishi nazorat ostida. Sharhlovchilar Tracker’ning xarakterini krossover ko‘rinishidagi yengil avtomobilga qiyoslagan. Bu model Chevrolet qatorida ilgari Cruze kabi sedanlar egallagan hamyonbop avtomobil o‘rnini to‘ldirayotgani bilan izohlanadi.
Tejamkorlik, xavfsizlik va asosiy kamchiliklar
Tracker’ning rasmiy o‘rtacha yonilg‘i sarfi AQSh o‘lchovida bir gallon uchun 30 milni, ya’ni taxminan 7,8 litr/100 kilometrni tashkil qiladi. Kattaroq diskli versiyalarda ko‘rsatkich biroz yomonlashadi. Bir haftalik aralash shahar va magistral sinovida real sarf qariyb 8,2 litr/100 kilometr bo‘lgan.
Soatiga 88 kilometr tezlikda salondagi shovqin darajasi 57,1 detsibelni tashkil etgan. Sinov yomg‘irli sharoitda o‘tkazilganiga qaramay, bu segment uchun yaxshi natija deb baholangan.
Chevrolet faol xavfsizlik tizimlarining asosiy qismini barcha versiyalarda standart taqdim etadi. Yuqori komplektatsiyalarda yoki qo‘shimcha paket orqali ko‘r hudud nazorati va moslashuvchan kruiz-nazorat kabi funksiyalarni olish mumkin.
Avvalroq Kursiv Uzbekistan nashri Chevrolet yangi avtomobilini sotuvga chiqargani haqida yozgan edi.
