Prezident Shavkat Mirziyoyev Markaziy Osiyo, Janubiy Kavkaz va Afg‘onistonni birlashtiruvchi yagona taraqqiyot makonini shakllantirish uchun tarixiy imkoniyat ochilayotganini ta’kidladi. Prezident bu haqda Markaziy Osiyo va Ozarbayjon davlat rahbarlarining norasmiy Maslahat uchrashuvida so‘zlagan nutqida aytdi.
Mirziyoyev Qirg‘iziston prezidenti Sadir Japarovga uchrashuvni o‘tkazish tashabbusi va Issiqko‘l sohilidagi qabul uchun minnatdorlik bildirdi. Shuningdek, Qirg‘izistonning BMT Xavfsizlik Kengashining doimiy bo‘lmagan a’zosi etib saylangani bilan qirg‘iz xalqini tabrikladi.
Ozarbayjonning qo‘shilishi yangi bosqich deb baholandi
Davlat rahbari Ozarbayjonning Maslahat uchrashuvlari formatiga qo‘shilishi mintaqaviy hamkorlikni yangi darajaga olib chiqishini ta’kidladi.
Uning fikricha, bu hamkorlik endi faqat Markaziy Osiyo doirasida emas, balki Janubiy Kavkaz va Afg‘oniston bilan bog‘langan kengroq makromintaqaviy maydonda rivojlanishi mumkin.
Yagona taraqqiyot makoni taklif qilindi
Mirziyoyev Markaziy Osiyo, Janubiy Kavkaz va Afg‘onistonni bog‘lovchi yagona taraqqiyot makonini shakllantirish muhimligini qayd etdi.
Prezidentga ko‘ra, bunday yondashuv transport, savdo, sanoat, raqamli xizmatlar, investitsiya va inson kapitali sohalarida o‘zaro bog‘liqlikni kuchaytiradi.
Mintaqaviy hamkorlik institutlari kuchaytiriladi
Davlat rahbari mintaqaviy hamkorlikning barqaror arxitekturasini shakllantirish vaqti kelganini aytdi.
Bu tizim samarali institutlar, tarmoq idoralari o‘rtasidagi yaqin aloqalar, hududlarning to‘g‘ridan to‘g‘ri hamkorligi va uzoq muddatli qo‘shma dasturlarga tayanishi kerakligi ta’kidlandi.
Savdo va transport aloqalariga urg‘u berildi
Prezident savdo-iqtisodiy va transport sohasidagi bog‘liqlikni mustahkamlash, sanoat-texnologik zanjirlarni kengaytirish, umumiy raqamli xizmatlarni rivojlantirish va investitsiya platformalarini ishga tushirish zarurligini bildirdi.
Shuningdek, Markaziy Osiyoni ta’lim, ilm-fan va katta ma’lumotlar sohasida raqobatbardosh innovatsion xabga aylantirish taklif qilindi.
Iqlim xavflariga birgalikda javob berish kerak
Mirziyoyev atrof-muhitni muhofaza qilish mintaqaviy kun tartibining ustuvor yo‘nalishi bo‘lib qolishini aytdi.
U joriy yozdagi anomal issiq ob-havo iqlim o‘zgarishi iqtisodiyot, suv va energetika xavfsizligi, odamlar salomatligi hamda hayot sifatiga bevosita ta’sir qilayotganini ko‘rsatganini qayd etdi.
Gumanitar aloqalar ham muhim yo‘nalish sifatida ko‘rsatildi
Prezident xalqlar o‘rtasidagi tarixiy, madaniy va insoniy aloqalarni yanada mustahkamlash zarurligini ta’kidladi.
Uning fikricha, hamkorlik chuqurlashgani sari mintaqada hamjihatlik tuyg‘usi kuchaymoqda va umummintaqaviy o‘ziga xoslik bosqichma-bosqich shakllanmoqda.
Eslatib o‘tamiz, avvalroq O‘zbekiston, Qirg‘iziston va Ozarbayjon Birinchi xonimlari «Altin balalik» markaziga tashrif buyurgani haqida xabar berilgandi. Tashrif davomida oliy martabali mehmonlar markaz faoliyati bilan tanishib, tarbiyalanuvchilar uchun tashkil etilgan mahorat darslarini kuzatdi hamda bolalar bilan samimiy suhbatlashdi.
