Chevrolet Tracker qaysi davlatlarda sotiladi — narxlar

Chevrolet Tracker bir xil nom bilan sotilsa-da, uning narxi, komplektatsiyasi va ayrim texnik xususiyatlari bozordan bozorga keskin farq qiladi. Kursiv Uzbekistan modelning turli davlatlardagi narxlari va texnik xususiyatlarni bitta materialga jamladi.

O‘zbekiston

O‘zbekistonda Chevrolet Tracker to‘rtta komplektatsiyada ishlab chiqariladi va sotiladi. LS Plus narxi 223,8 mln so‘m, LTZ Plus — 246,9 mln so‘m, Premier Plus — 276 mln so‘m, Redline esa 285,8 mln so‘m turadi.

Barcha versiyalarga 132 ot kuchi va 190 Nm aylanish momentini ishlab chiqaradigan 1,2 litrli uch silindrli turbomotor, olti pog‘onali avtomatik uzatmalar qutisi hamda old uzatma o‘rnatiladi. Avtomobil 100 km/soat tezlikka 11,1 soniyada chiqadi, maksimal tezligi 180 km/soat, yukxonasi esa 390 litrni tashkil etadi.

LS Plus’da ikkita xavfsizlik yostiqchasi, ESC, ABS, konditsioner va sakkiz dyuymli multimedia tizimi mavjud. LTZ Plus’da yon va parda xavfsizlik yostiqchalari, orqa kamera, ko‘r nuqtalarni nazorat qilish, kalitsiz kirish va kruiz-nazorat qo‘shiladi. Premier Plus va Redline’da panoramali lyuk, avtomatik tormozlash, to‘qnashuv haqida ogohlantirish, iqlim nazorati, simsiz quvvatlash hamda kengaytirilgan haydovchi yordamchilari mavjud.

Qozog‘iston

Qozog‘iston bozorida Tracker ikkita asosiy komplektatsiyada taklif qilinmoqda. 1LT AT narxi 10,24 mln tenge, Premier AT esa 10,74 mln tenge turadi. Bu taxminan $21,8–22,9 mingga teng.

Mahalliy model ham 132 ot kuchili turbomotor, avtomatik uzatmalar qutisi va old uzatma bilan jihozlangan. 1LT’da old to‘qnashuv haqida ogohlantirish, orqa kamera, kalitsiz kirish va old-orqa to‘xtash sensorlari bor. Premier versiyasida simsiz quvvatlash, yomg‘ir sensori, iqlim nazorati, charm bilan qoplangan rul va rangli asboblar paneli qo‘shiladi.

Qirg‘iziston

Qirg‘izistonda Tracker’ning boshlang‘ich narxi 1,667 mln somni tashkil etadi. Rasmiy tijorat taklifida LS 1,667 mln, LTZ 1,827 mln va Premier 1,927 mln somdan baholangan. Dollar ekvivalentida narxlar taxminan $19,1–22 ming oralig‘iga to‘g‘ri keladi.

Avtomobil 1,2 litrli, 132 ot kuchiga ega turbomotor, avtomatik transmissiya va old uzatma bilan sotiladi. Yukxona hajmi 393 litr. LS’da konditsioner, 16 dyuymli disklar va bazaviy xavfsizlik tizimlari mavjud. LTZ ko‘r nuqtalarni kuzatish, kruiz-nazorat va orqa kamera oladi. Premier’da panoramali lyuk, avtomatik tormozlash, simsiz quvvatlash, iqlim nazorati va yarim avtomatik to‘xtash tizimi mavjud.

Gruziya

Gruziyaning rasmiy Chevrolet saytida Tracker LTZ va Tracker Premier sotilmoqda. LTZ’ning odatiy narxi $21,6 ming bo‘lsa-da, amaldagi taklifda $19,3 ming ko‘rsatilgan. Premier’ning ro‘yxat narxi $24,5 ming, chegirmadagi narxi esa $22,9 mingni tashkil etadi.

Rasmiy sahifada Tracker shahar uchun mo‘ljallangan ixcham krossover sifatida taqdim etilgan. Yuqori versiyada panoramali lyuk, keng markaziy ekran, ruldagi boshqaruv tugmalari va kengaytirilgan xavfsizlik jihozlari mavjud.

Ozarbayjon

Chevrolet’ning Ozarbayjondagi rasmiy distribyutori Tracker’ni amaldagi modellar qatorida ko‘rsatmoqda. Biroq saytning joriy versiyasida avtomobil narxi va komplektatsiyalar bo‘yicha batafsil ochiq jadval mavjud emas. Xarid qiymati kredit yoki lizing so‘rovi yuborilgandan keyin diler tomonidan taqdim etiladi.

Mo‘g‘uliston

Mo‘g‘ulistondagi rasmiy Chevrolet distribyutori ham Tracker’ni SUV turkumida namoyish etmoqda. Saytda model uchun broshyura, foydalanish qo‘llanmasi va Ulan-Batordagi rasmiy diler ma’lumotlari mavjud, biroq narx qismida aniq summa berilmagan. Shu sababli Mo‘g‘ulistondagi xarid qiymatini diler orqali aniqlash talab etiladi.

Braziliya

Braziliya Tracker uchun eng katta va versiyalar soni eng ko‘p bo‘lgan bozorlardan biridir. Bu yerda yangilangan 2027-yilgi model beshta komplektatsiyada sotilmoqda. Turbo AT narxi 119,9 ming real, LT Turbo AT — 146,6 ming real, LTZ Turbo AT — 162,8 ming real, Premier Turbo — 179,7 ming real va RS Turbo — 180,7 ming real turadi. Dollar hisobida diapazon taxminan $23,5–35,3 mingni tashkil etadi.

Bazaviy versiyada turbomotor, olti pog‘onali avtomatik uzatmalar qutisi, to‘liq LED yoritgichlar va simsiz smartfon integratsiyasi mavjud. LT 11 dyuymli MyLink ekrani va sakkiz dyuymli raqamli panel oladi. LTZ’dan boshlab avtomatik favqulodda tormozlash, piyoda va velosipedchini aniqlash hamda qatorni ushlab turish tizimlari qo‘shiladi. Premier avtomatik parkovka, RS esa panoramali lyuk va sport dizayni bilan ajralib turadi. Dvigatel quvvati versiyaga qarab 141 ot kuchigacha yetadi.

Argentina

Argentinada 2026-yilgi Tracker to‘rtta versiyada mavjud. LT AT Turbo 39,55 mln peso, LTZ AT Turbo 45,15 mln peso, Premier AT Turbo 49,13 mln peso va RS AT Turbo 49,54 mln peso turadi. Amaldagi kurs bo‘yicha boshlang‘ich narx taxminan $26,4 ming, eng yuqori komplektatsiya esa $33,1 ming atrofida.

Barcha versiyalar turbomotor va olti pog‘onali avtomatik transmissiya bilan jihozlangan. LT’da sakkiz dyuymli MyLink ekrani va LED faralar mavjud. LTZ avtomatik iqlim nazorati, 17 dyuymli disklar, favqulodda tormozlash va ko‘r nuqta nazoratini oladi. Premier hamda RS’da panoramali lyuk, simsiz quvvatlash va kengaytirilgan haydovchi yordamchilari bor.

Kolumbiya

Kolumbiyada Tracker LS 91,8 mln peso, LTZ 109,9 mln peso, Premier 118,9 mln peso va RS 120,9 mln peso turadi. Taxminiy dollar ekvivalenti $28,6 mingdan $37,7 minggacha yetadi. Bu Tracker sotiladigan eng qimmat bozorlardan biri hisoblanadi.

Barcha komplektatsiyalar olti pog‘onali avtomatik uzatmalar qutisi bilan taklif qilinadi. LS’da sakkiz dyuymli ekran, LED faralar va simsiz smartfon ulanishi bor. LTZ’dan boshlab raqamli iqlim nazorati, to‘qnashuvni aniqlash va avtomatik tormozlash qo‘shiladi. Premier va RS panoramali lyuk, simsiz quvvatlash, ko‘r nuqta monitoringi va yuqori darajadagi salon bezaklariga ega.

Ekvador

Ekvadorda rasmiy saytda faqat Tracker LTZ ko‘rsatilgan. Uning narxi $28,99 mingdan boshlanadi. Ayrim davrlarda xaridorlarga $2 minggacha bonus taklif qilinadi.

Avtomobil olti pog‘onali avtomatik transmissiya, 11 dyuymli multimedia ekrani, sakkiz dyuymli raqamli asboblar paneli, 17 dyuymli disklar va ekotermidan tayyorlangan o‘rindiqlar bilan jihozlangan. Xavfsizlik tizimlari orasida old to‘qnashuv haqida ogohlantirish, avtomatik tormozlash va ko‘r nuqtalarni nazorat qilish mavjud.

Peru

Peruda Tracker LTZ AT $19,99 ming yoki 73,9 ming sol, RS AT esa $22,99 ming yoki 85 ming sol turadi. Biroq boshlang‘ich narx moliyalashtirish va maxsus bonuslarni o‘z ichiga oladi, shu sababli naqd xariddagi yakuniy qiymat farq qilishi mumkin.

LTZ’da simsiz Apple CarPlay va Android Auto, ekotermili o‘rindiqlar, raqamli iqlim nazorati, 17 dyuymli disklar, avtomatik tormozlash va ko‘r nuqta monitoringi mavjud. RS versiyasiga sport bezaklari, qora disklar, simsiz quvvatlash va panoramali lyuk qo‘shilgan.

Chili

Chilida Tracker LTZ AT 18,49 mln peso, Premier esa 19,99 mln peso turadi. Amaldagi valyuta kursida bu taxminan $19,7–21,3 mingga teng.

LTZ standart holatda oltita xavfsizlik yostiqchasi, 11 dyuymli MyLink ekrani, yetti dyuymli raqamli panel, OnStar va ekotermili o‘rindiqlarni taklif etadi. Premier’da panoramali lyuk, ko‘r nuqta nazorati va favqulodda tormozlash tizimi mavjud.

Urugvay

Urugvayda LT AT Turbo $27,99 ming, LTZ AT Turbo $30,99 ming, Premier AT Turbo $33,79 ming va RS AT Turbo $33,99 mingdan ko‘rsatilgan. Barcha versiyalar turbomotor va olti pog‘onali avtomatik transmissiyaga ega.

LTZ’dan boshlab avtomatik iqlim nazorati, 17 dyuymli disklar, favqulodda tormozlash va ko‘r nuqta monitoringi mavjud. Premier hamda RS panoramali lyuk bilan jihozlanadi. Rasmiy sahifadagi izohda bu narxlarning amal qilish muddati 2026-yil 31-iyulgacha ekani yozilgan, shu sababli avgust oyidagi yakuniy qiymatni dilerda qayta tasdiqlash kerak.

Paragvay

Paragvay Tracker nisbatan arzon sotiladigan Lotin Amerikasi bozorlaridan biri. Lite AT Turbo $19,99 ming, LTZ AT Turbo $22,49 ming, Premier AT Turbo $26,49 ming va RS AT Turbo $26,99 ming turadi.

Lite’da olti pog‘onali avtomatik transmissiya, 17 dyuymli po‘lat disklar, sakkiz dyuymli MyLink ekrani va LED faralar mavjud. LTZ ilg‘or xavfsizlik yordamchilarini, Premier avtomatik parkovka va panoramali lyukni, RS esa sport uslubidagi qora disklar va tashqi bezaklarni oladi.

Boliviya

Boliviyada Tracker LTZ AT va RS AT komplektatsiyalarida sotiladi. LTZ’da Apple CarPlay va Android Auto, 17 dyuymli disklar, avtomatik iqlim nazorati, old to‘qnashuvni aniqlash va favqulodda tormozlash mavjud. RS simsiz quvvatlash, panoramali lyuk va sport bezaklari bilan ajralib turadi.

Rasmiy Chevrolet sayti ikkala versiya uchun ham ochiq narx bermaydi. Xaridor konfiguratsiyani tanlab, diler orqali individual hisob-kitob olishi kerak.

Meksika

Meksikada 2026-yilgi Tracker LT va Premier avtomatik versiyalarda sotiladi. LT’ning ro‘yxat narxi 537,5 ming peso, moliyalashtirish yoki lizing dasturidagi amaldagi boshlang‘ich narxi esa 425 ming pesoni tashkil etadi. Aksiya 2026-yil avgust oyida ham rasmiy saytda ko‘rsatilmoqda. Chegirmadagi summa taxminan $24,4 ming, ro‘yxat narxi esa $30,9 mingga teng.

Meksika versiyasiga 130 ot kuchili 1,2 litrli turbomotor va olti pog‘onali avtomatik transmissiya o‘rnatilgan. Jihozlar orasida oltita xavfsizlik yostiqchasi, sakkiz dyuymli ekran, simsiz Apple CarPlay va Android Auto, StabiliTrak, OnStar hamda Wi-Fi mavjud.

Gvatemala

Gvatemalada Chevrolet Tracker narxi 144,9 ming ketsaldan boshlanadi va QQSni o‘z ichiga oladi. Bu taxminan $18,8 mingga teng. Mamlakatda LS, LT va Premier versiyalari mavjud.

Barcha versiyalarda 130 ot kuchili 1,2 litrli turbomotor, olti pog‘onali avtomatik transmissiya va oltita xavfsizlik yostiqchasi mavjud. LS 16 dyuymli disklar oladi, Premier’da esa LED faralar, 17 dyuymli disklar, panoramali lyuk, simsiz quvvatlash, yarim avtomatik parkovka va favqulodda tormozlash tizimi bor.

Panama

Panamada yangilangan Tracker 2026 rasmiy ravishda taklif qilinmoqda. Avtomobil 1,2 litrli turbomotor, 11 dyuymli HD multimedia ekrani, raqamli asboblar paneli va simsiz smartfon integratsiyasiga ega. Biroq Chevrolet Panama sayti narxni ochiq e’lon qilmaydi va xaridorlardan alohida so‘rov yuborishni talab qiladi.

Dominikana Respublikasi

Dominikana Respublikasida bir vaqtning o‘zida oldingi va yangilangan Tracker taklif qilinmoqda. Oldingi Tracker LS $26,5 mingdan boshlanadi. U 130 ot kuchili 1,2 litrli turbomotor, olti pog‘onali avtomatik uzatmalar qutisi va old uzatmaga ega.

Rasmiy sayt menyusida «Yangi Tracker» uchun alohida $32,5 minglik boshlang‘ich narx ham ko‘rsatilgan. Bu mamlakatda eski va yangi model parallel sotilayotganini anglatadi.

Narxlar jadvali:

Avvalroq Kursiv Uzbekistan nashri Chevrolet Tracker 2026 qachondan ishlab chiqarilmasligi haqida yozgan edi.