Navoiy viloyatining Konimex tumanida o‘tkazilgan tezkor tadbirda 2,9 kg opiy moddasi musodara qilindi. Giyohvandlik vositasi «Cobalt» avtomashinasida yo‘lovchi sifatida ketayotgan Qozog‘iston fuqarosiga tegishli sellofan paketdan topilgan.
Davlat xavfsizlik xizmatiga ko‘ra, tuman hududida harakatlanayotgan «Cobalt» avtomobili to‘xtatilib ko‘zdan kechirilgan. Tekshiruv vaqtida avtomobilda yo‘lovchi sifatida ketayotgan 2002-yilda tug‘ilgan Qozog‘iston fuqarosiga tegishli paketda opiy moddasi borligi aniqlangan.
Modda yashirin joydan olingani aytilmoqda
Ma’lumotga ko‘ra, fuqaro ushbu giyohvandlik vositasini avval narkokuryerlar tomonidan qo‘shni davlatdan kontrabanda yo‘li bilan olib kirilgan va xufiya joyga qoldirib ketilgan manzildan olib ketayotgan bo‘lgan. Musodara qilingan 2 kg 87 gramm opiy ashyoviy dalil sifatida rasmiylashtirilgan.
Gumonlanuvchiga qamoq ehtiyot chorasi qo‘llandi
Holat yuzasidan Qozog‘iston fuqarosiga nisbatan Jinoyat kodeksining 246-moddasi 2-qismi bilan jinoyat ishi qo‘zg‘atilgan. Unga nisbatan qamoq ehtiyot chorasi qo‘llanilgan. Ayni paytda tergov harakatlari davom etmoqda.
Eslatib o‘tamiz, avvalroq Toshkentda 600 mln so‘mlik kontrafakt dorilar topilgani haqida xabar qilingandi.
