Jorjina va Ronaldu muhabbati, Markaziy bank soxta litsenziya haqida ogohlantirdi — 6-avgust kuni e’lon qilingan yangiliklar dayjesti.
Markaziy bank soxta litsenziya haqida ogohlantirdi
Markaziy bank internetda uning nomidan tayyorlangan soxta litsenziya tarqatilayotganini ma’lum qildi. Hujjatda ko‘rsatilgan «Oltin Oy Kredit» aksiyadorlik-tijorat banki mavjud emas va unga Markaziy bank tomonidan hech qanday litsenziya berilmagan.
Regulyator ushbu tashkilotga hech qanday litsenziya berilmaganini ma’lum qildi.
«Izza» bozoridagi yong‘inda 400 kvadrat metr maydon zarar ko‘rdi
Toshkent viloyati Zangiota tumanida joylashgan «Izza» bozorida 6-avgust kuni yong‘in sodir bo‘ldi. Favqulodda vaziyatlar vazirligi ma’lum qilishicha, hodisa oqibatida jabrlanganlar yo‘q, biroq do‘konlarning 400 kvadrat metr qismi yonib ketgan.
Dastlabki ma’lumotlarga ko‘ra, yong‘in Zangiota tumani Tokzor mahallasidagi bozordagi do‘konlardan birida boshlangan. Hodisa haqida FVBga soat 12:29 da xabar kelib tushgan va voqea joyiga zudlik bilan yong‘in-qutqaruv ekipajlari yuborilgan.
O‘zbekistonliklar Rossiyadan voz kechmoqda: migrantlar soni kamaydi
2026-yilning dastlabki olti oyida O‘zbekiston fuqarolarining Rossiyaga mehnat faoliyati uchun kirishlari o‘tgan yilning shu davriga nisbatan 13,2 foizga qisqardi. Bu haqda «Vedomosti» Rossiya Chegara xizmati ma’lumotlariga tayanib xabar berdi.
Statistikaga ko‘ra, pasayishga qaramay, Rossiyaga ishlash maqsadida eng ko‘p kirayotgan xorijliklar orasida O‘zbekiston fuqarolari yetakchilikni saqlab qolgan. Yanvar–iyun oylarida ular 1,17 million martadan ortiq ishlash maqsadida mamlakatga kirgan.
Tadbirkorlik subyektlari xavfi 3 toifaga ajratiladi
O‘zbekistonda sanoat, radiatsiya va yadro xavfsizligi sohalarida tadbirkorlik subyektlari tadbirkorlik subyektlari xavfi 3 toifaga ajratiladi. Bu haqda Adliya vazirligi xabar bermoqda.
Adliya vazirligi sanoat, radiatsiya va yadro xavfsizligi sohasidagi qonunchilikka rioya etilishini nazorat qilishda mazkur tizimni qo‘llash tartibi to‘g‘risidagi nizomni davlat ro‘yxatidan o‘tkazdi. Hujjat 2026-yil 1-avgustda 3915-son bilan ro‘yxatga olingan.
Toshkentda yigit buvisi tengi ayolga tegajog‘lik qildi
Toshkentning Yashnobod tumanida mast holatda keksa ayolga tegajog‘lik qilgan 22 yoshli yigitga nisbatan ma’muriy ish rasmiylashtirildi. Bu haqda poytaxt Ichki ishlar bosh boshqarmasi ma’lum qildi.
Ma’lumotlarga ko‘ra, voqea 4-avgust kuni ertalab soat 05:30 lar atrofida Shirinobod mahallasi hududida sodir bo‘lgan. 2004-yilda tug‘ilgan fuqaro alkogol ta’sirida bo‘lgan holda yoshi katta ayolga nisbatan nomunosib harakatlar qilgan.
Toshkentdagi Milliy bog‘da 4 yoshli qiz cho‘kib ketdi
Joriy yilning 5 avgust kuni Toshkent shahrining Chilonzor tumanidagi Milliy bog‘ cho‘milish havzasida 2022-yilda tug‘ilgan qizaloq cho‘milish vaqtida suvga cho‘kib ketdi. Bu haqda Kursiv Uzbekistan’ga Bosh prokuratura matbuot kotibi Hayot Shamsutdinov xabar berdi.
Ma’lum qilinishicha, hodisa soat taxminan 16:30 larda sodir bo‘lgan. Qizaloq 2017-yilda tug‘ilgan opasi hamda buvisi bilan birga Milliy bog‘dagi cho‘milish sohiliga borgan. Cho‘milish jarayonida qizaloq suvga cho‘kib ketgan.
Yaponiyada ish: haydovchilar uchun ish o‘rinlari ochildi
Migratsiya agentligi Yaponiyada avtobus va yuk mashinasi haydovchisi bo‘lib ishlash uchun grant dasturiga navbatdagi qabul boshlanganini ma’lum qildi. Loyiha Yaponiyaning Onodera User Run va Willer Express kompaniyalari bilan hamkorlikda amalga oshiriladi.
Dasturda 21 yoshdan 35 yoshgacha bo‘lgan, D, CE yoki BC toifalaridan kamida bittasiga ega tajribali haydovchilar qatnashishi mumkin. Nomzod haydovchilik guvohnomasini kamida 2,5 yil avval olgan hamda hujjat berilganidan keyin O‘zbekistonda kamida uch oy yashagan bo‘lishi kerak.
Hindistonda musson yomg‘irlari 100 dan ortiq odamni halok qildi
Hindistonning turli hududlarida bir oydan buyon davom etayotgan kuchli musson yomg‘irlari, suv toshqinlari va momaqaldiroq oqibatida 100 dan ortiq odam halok bo‘ldi. Ayrim shtatlarda yog‘ingarchilik davom etishi kutilayotgani sabab qurbonlar soni yana oshishi mumkin, deya xabar berdi Deutsche Welle.
Tabiiy ofatlar mamlakat janubi va sharqidagi hududlarga jiddiy zarar yetkazgan. Kuchli yomg‘irlar transport qatnovini izdan chiqargan, aholi punktlarini suv bosgan va qutqaruv ishlarini murakkablashtirgan.
Krishtianu Ronaldu va Jorjina Rodrigesning sevgi hikoyasi
Krishtianu Ronaldu va Jorjina Rodrigesning munosabatlari zamonaviy futbol olamidagi eng ko‘p muhokama qilinadigan sevgi hikoyalaridan biriga aylangan. Ularning tanishuvi Madrid markazidagi moda do‘konida boshlangan bo‘lsa, keyinchalik bu munosabat katta oila, dunyoning turli mamlakatlaridagi hayot, dabdabali sovg‘alar va murakkab sinovlarni birgalikda yengib o‘tish tarixiga aylandi. Kursiv Uzbekistan juftlikning tanishuvi va hozirgi kungacha bo’lgan sevgi yo‘li haqida hikoya qiladi.
Krishtianu Ronaldu va Jorjina Rodriges 2016-yilda Madridda tanishgan. O‘sha paytda Ronaldu «Real Madrid»ning asosiy yulduzi, dunyodagi eng mashhur futbolchilardan biri edi. Jorjina esa Gucci butikida savdo maslahatchisi bo‘lib ishlardi.
Bank va mikromoliya tashkilotlari islomiy bank faoliyatiga o‘tishi mumkin
O‘zbekistonda banklar va mikromoliya tashkilotlari o‘z faoliyatini islomiy bank faoliyatiga o‘zgartirishi mumkin bo‘ladi. Adliya vazirligi mikromoliya tashkiloti va bank faoliyatini o‘zgartirish tartibi haqidagi nizomga kiritilgan o‘zgartirishlarni davlat ro‘yxatidan o‘tkazdi.
Yangi tartibga ko‘ra, mikromoliya tashkiloti faqat islomiy bank faoliyatini amalga oshiruvchi mikromoliya bankiga aylanishi mumkin.
