spb.stores-apple.com
Apple 10-avgustdan iPhone 17 smartfonlari narxini 50–100 dollarga oshirishi mumkin. Bu haqda MacRumors xabar berdi.
Bunga yarimo‘tkazgich xotiralari bozoridagi inqiroz sabab bo‘layotgani aytilmoqda. Kompaniya ayni vaqtda iPhone 18 taqdimotiga tayyorgarlik doirasida ishlab chiqarish quvvatlarini 30 foizga qisqartirishni rejalashtirayotgani haqida ham ma’lumotlar paydo bo‘ldi.
iPhone 17 narxi qanchaga oshadi?
Insayderlar ma’lumotlariga ko‘ra, Apple 10-avgust, dushanba kunidan boshlab iPhone 17 narxlarini jahon bozorida qayta ko‘rib chiqishi mumkin.
Avvalroq kompaniya Mac, iPad va Apple Vision qurilmalari narxlarini oshirgan edi. iPhone liniyasi esa hozircha bu o‘zgarishlardan chetda qolgan. Istisno tariqasida Yaponiyada iPhone narxi allaqachon 8–11 foizga oshirilgan.
Tahlilchilarning fikricha, iPhone, AirPods va Apple Watch narxlarining qayta ko‘rib chiqilishi vaqt masalasi bo‘lgan.
Ishlab chiqarish 30 foizga qisqaradi
Apple’ning ishlab chiqarish quvvatlarini 30 foizga kamaytirishi iPhone 18 avlodini chiqarishga tayyorgarlik bilan bog‘liq ekani aytilmoqda.
Bozor tahlilchilari yangi avlod flagmanlari, xususan, iPhone 18 Pro narxi amaldagi modellarga nisbatan 50–100 dollarga qimmatroq bo‘lishini prognoz qilmoqda.
Mutaxassislar narxlarning oshishiga asosiy omillardan biri sifatida yarimo‘tkazgich xotiralari bozoridagi ta’minot muammolarini ko‘rsatmoqda. Ushbu omil ayniqsa iPhone 18 Pro narxiga sezilarli ta’sir qilishi mumkin.
Qaysi iPhone 17 modellari qimmatlashadi?
Hozircha narx oshishi iPhone 17 liniyasining barcha modellariga tegishlimi yoki faqat ayrim konfiguratsiyalarni qamrab oladimi — noma’lum.
Xususan, bazaviy iPhone 17, iPhone 17 Plus, iPhone 17 Pro va iPhone 17 Pro Max modellarining qaysi biri uchun yangi narxlar joriy etilishi aniq emas.
Apple hozircha izoh bermadi
Ma’lumotlar sanoatdagi aloqalari bilan tanilgan insayder manbasiga tayanadi. Biroq Apple kompaniyasi narxlarning oshirilishi yoki ishlab chiqarish hajmining qisqartirilishi haqida hozircha rasmiy bayonot bergan emas.
Avvalroq Apple yaqin oylar ichida Ultra nomi ostida bir nechta yangi qurilmalarni taqdim etishi mumkinligi haqida xabar berilgandi.
