Vivo kompaniyasining navbatdagi Vivo X500 flagmanlar oilasi haqida yangi ma’lumotlar paydo bo‘ldi. Bu haqda Gizmochina nashri xabar bermoqda.
Manbaga ko‘ra, standart Vivo X500 modeli dizayn jihatidan X500 Pro va X500 Pro Max versiyalaridan sezilarli farq qilishi mumkin.
Asosiy o‘zgarish orqa kamera blokida kuzatilishi kutilmoqda. Pro modellarda yirik dumaloq kamera moduli markazga joylashtirilishi aytilayotgan bo‘lsa, standart Vivo X500’da u korpusning yuqori chap qismiga o‘rnatilishi mumkin.
Vivo X500 6,59 dyuymli tekis ekran olishi mumkin
Dastlabki ma’lumotlarga ko‘ra, standart Vivo X500 taxminan 6,59 dyuymli tekis displey bilan jihozlanadi.
X500 Pro oilasida esa ikki xil ekran o‘lchami kutilmoqda. Ulardan biri taxminan 6,37 dyuym, ikkinchisi esa 6,85 dyuym bo‘lishi mumkin. Pro modellarning barcha to‘rt tomonida juda ingichka ramkalar va kattaroq yumaloqlangan burchaklar qo‘llanishi aytilmoqda.
Seriya smartfonlarida 1.5K yoki 2K aniqlikdagi, 144 Hzgacha yangilanish chastotasini qo‘llab-quvvatlovchi displeylar ishlatilishi mumkin.
Dimensity 9600 protsessori kutilmoqda
Standart Vivo X500 MediaTek Dimensity 9600 chipida ishlashi mumkin.
X500 Pro va X500 Pro Max modellari uchun esa kuchliroq Dimensity 9600 Pro platformasi tilga olinmoqda. Agar ma’lumot tasdiqlansa, Vivo standart va Pro versiyalarni nafaqat dizayn, balki unumdorlik bo‘yicha ham ajratadi.
Hozircha protsessorlarning yakuniy xususiyatlari va smartfonlarning xotira konfiguratsiyalari haqida ma’lumot berilmagan.
Pro modellarga Sony kamerasi o‘rnatilishi mumkin
Vivo X500 Pro oilasida 50 MP aniqlikdagi Sony asosiy kamera sensori qo‘llanishi kutilmoqda.
Manbaga ko‘ra, kamera LOFIC texnologiyasini qo‘llab-quvvatlaydi. Ushbu texnologiya yuqori kontrastli sahnalarda dinamik diapazonni kengaytirish, yorug‘ va qorong‘i qismlardagi tafsilotlarni yaxshiroq saqlashga xizmat qiladi.
Bu ayniqsa orqadan kuchli yorug‘lik tushadigan kadrlar va tungi suratga olishda tasvir sifatini yaxshilashi mumkin.
Taqdimot sentabrda bo‘lishi mumkin
Hozirgi ma’lumotlarga ko‘ra, Vivo X500 seriyasi 2026-yil sentabr oyida taqdim etilishi mumkin.
Shu bilan birga, seriyaning global versiyalari turli sertifikatlash jarayonlaridan o‘tayotgani aytilmoqda. Bu smartfonlarning xalqaro bozorda ham uzoq kuttirmasdan paydo bo‘lishi mumkinligiga ishora qiladi.
Biroq Vivo hozircha X500, X500 Pro va X500 Pro Max modellari, ularning texnik xususiyatlari yoki rasmiy taqdimot sanasini tasdiqlamagan. Shu sabab hozirgi ma’lumotlar insayderlik xabarlari sifatida baholanishi kerak.
Eslatib o‘tamiz, Kursiv Uzbekistan nashri Vivo X300e smartfoni sotuvga chiqqani haqida yozgan edi.
