2026-yilning yanvar – iyun oylarida O‘zbekistonda ta’lim sohasida ko‘rsatilgan xizmatlar hajmi 23,8 trln so‘mni tashkil etdi. Bu haqda Milliy statistika qo‘mitasi ma’lum qildi.
Ko‘rsatkich 2025-yilning mos davridagiga nisbatan 22,7 foizga oshgan. Ta’lim xizmatlari tarkibida eng katta ulush oliy ta’lim hissasiga to‘g‘ri kelgan.
Oliy ta’lim xizmatlari yetakchi bo‘ldi
Statistika qo‘mitasi ma’lumotlariga ko‘ra, yanvar – iyun oylarida ko‘rsatilgan jami ta’lim xizmatlarining 42,4 foizi oliy ta’lim sohasi hissasiga to‘g‘ri kelgan.
Bu oliy ta’lim xizmatlari mamlakat ta’lim xizmatlari bozorining eng yirik qismini tashkil etayotganini ko‘rsatadi.
Ta’lim xizmatlarining yarmidan ko‘pi Toshkent hissasiga to‘g‘ri keldi
Hududlar orasida eng yuqori ko‘rsatkich Toshkent shahrida qayd etildi. Poytaxtda olti oy davomida 12,7 trln so‘mlik ta’lim xizmatlari ko‘rsatilgan.
Keyingi o‘rinlarda Samarqand va Farg‘ona viloyatlari turibdi – har ikki hududda xizmatlar hajmi 1,5 trln so‘mdan bo‘lgan. Andijon viloyatida bu ko‘rsatkich 1,2 trln so‘mni, Toshkent va Namangan viloyatlarida esa 1,1 trln so‘mdan tashkil etdi.
Buxoro viloyatida ta’lim xizmatlari hajmi 1 trln so‘mga yetgan. Qashqadaryo viloyatida 877,7 mlrd so‘m, Qoraqalpog‘iston Respublikasida 691,3 mlrd so‘m, Xorazm viloyatida 602,5 mlrd so‘m va Surxondaryo viloyatida 577,8 mlrd so‘mlik xizmatlar ko‘rsatilgan.
Navoiy viloyatida ko‘rsatkich 373,6 mlrd so‘m, Jizzax viloyatida 323,9 mlrd so‘m bo‘lgan. Hududlar orasidagi eng past hajm Sirdaryo viloyatida qayd etilib, 243,6 mlrd so‘mni tashkil qildi.
Eslatib o‘tamiz, Kursiv Uzbekistan nashri akademik litseylarga kirish bo‘yicha apellyatsiya sanasi belgilangani haqida yozgan edi.
