Samsung hali One UI 9 operatsion qobig‘ining barqaror versiyasini chiqarmagan bo‘lsa-da, kompaniya allaqachon navbatdagi yirik yangilanish – One UI 9.5 ustida ishlashni boshlagan. Ma’lumotlarga ko‘ra, yangi dasturiy ta’minotning dastlabki ichki test yig‘ilmasi Galaxy S26 seriyasi uchun tayyorlangan.
Ishlar odatdagidan ertaroq boshlandi
Tarun Vats ma’lumotiga ko‘ra, Galaxy S26 uchun One UI 9.5 ning dastlabki test versiyasi identifikatori CZH1 bilan yakunlanadi.
Bu safar Samsung yangi qobiqni ishlab chiqishni avvalgidan ancha erta boshlagan. Taqqoslash uchun, o‘tgan yili Galaxy S25 uchun One UI 8.5 ustidagi ishlar sentabr o‘rtalarida boshlangan edi. One UI 9.5 bo‘yicha dastlabki ishlar esa avgust oyidayoq boshlangan.
Bu Samsung kelgusi dasturiy yangilanishlarni ishlab chiqish jarayonini tezlashtirayotganidan dalolat berishi mumkin.
One UI 9 hali beta-sinovda
Ayni paytda Samsung Galaxy S26 qurilmalari uchun One UI 9 ning barqaror versiyasini hali taqdim etmagan. Kompaniya ushbu qobiqni beta-sinovdan o‘tkazishda davom etmoqda va dastur ishtirokchilari uchun beshinchi test versiyasi ham tarqatila boshlagan.
Shu tariqa Samsung bir vaqtning o‘zida ikki avlod dasturiy ta’minoti ustida ishlamoqda: One UI 9 joriy sinov bosqichida bo‘lsa, One UI 9.5 ichki ishlab chiqish jarayoniga o‘tgan.
One UI 9.5 Galaxy S27 bilan chiqishi mumkin
Kutilishicha, One UI 9.5 One UI 9 dan keyingi yirik yangilanish bo‘lib, kelajakdagi Galaxy S27 smartfonlari bilan birga taqdim etilishi mumkin.
Hozircha Samsung yangi qobiqdagi o‘zgarishlarni rasman e’lon qilgani yo‘q. Dastlabki ma’lumotlarga ko‘ra, kompaniya interfeys dizaynini yanada rivojlantirishi, sun’iy intellekt asosidagi yangi funksiyalarni qo‘shishi hamda buklanuvchi qurilmalar uchun dasturiy imkoniyatlarni takomillashtirishi mumkin.
Eslatib o‘tamiz, Kursiv Uzbekistan nashri Galaxy S27 seriyasi qanday kamerada chiqishi haqida yozgan edi.
