Samsung AQSh bozorida Samsung Galaxy A57 smartfoni uchun vaqtinchalik chegirma e’lon qildi. Aksiya doirasida qurilmaning har ikki xotira versiyasi odatdagi narxidan $100 arzonroq sotilmoqda. Buning uchun eski smartfonni trade-in dasturi orqali topshirish talab etilmaydi, deb yozmoqda SamMobile.
Natijada Galaxy A57’ning 128 GB xotirali versiyasi $549 o‘rniga $449, 256 GB xotirali modeli esa $609 o‘rniga $509 ga tushdi.
Chegirma trade-in’siz beriladi
Yangi taklifning asosiy sharti — xaridor Galaxy A57’ni Samsung‘ning AQShdagi rasmiy onlayn do‘koni orqali xarid qilishi mumkin va $100 chegirmadan foydalanish uchun eski qurilmasini topshirishi shart emas.
Aksiya Galaxy A57’ning 128 va 256 GB xotirali versiyalariga birdek tatbiq etilgan. Xaridorlarga Awesome Icyblue, Awesome Navy va Awesome Gray ranglari taklif qilinmoqda.
Samsung chegirma qancha muddat amal qilishining aniq yakuniy sanasini hozircha ko‘rsatmagan, shu sababli taklif cheklangan muddat davomida mavjud bo‘lishi kutilmoqda.
Trade-in orqali $196 gacha tejash mumkin
Samsung Galaxy A57 xaridorlari uchun yana bir variant — kompaniyaning trade-in dasturi. Eski mos qurilmani topshirgan mijozlar yangi smartfon narxidan $196 gacha chegirma olishlari mumkin.
Biroq $100 miqdoridagi to‘g‘ridan-to‘g‘ri chegirma bilan trade-in orqali beriladigan chegirmani birlashtirib bo‘lmaydi. Xaridor ikki taklifdan faqat bittasini tanlashi kerak.
Masalan, trade-in dasturidan foydalanishni istamagan mijoz uchun Galaxy A57 128 GB versiyasining narxi $449 ni tashkil qiladi. Agar mos eski qurilma mavjud bo‘lsa, trade-in shartlari ayrim xaridorlar uchun kattaroq tejash imkonini berishi mumkin.
Smartfonni bo‘lib to‘lash ham mumkin
Galaxy A57 uchun Samsung Financing orqali bo‘lib to‘lash imkoniyati ham saqlanib qolgan. To‘lov muddati va oylik to‘lov miqdori tanlangan konfiguratsiya hamda xaridor uchun mavjud moliyalashtirish shartlariga qarab belgilanadi.
Hozircha $100 chegirma AQSh bozoridagi Samsung onlayn-do‘koni uchun e’lon qilingan.
Avvalroq «Kursiv» Samsung Galaxy qurilmalarida yangi funksiya joriy etilishi haqida yozgan edi.
