Husanov baloga qoldi: «Manchester Siti»ning mag‘lubiyatiga kim aybdor
O‘zbekiston terma jamoasi himoyachisi Abduqodir Husanov «Manchester Siti» safida yangi mavsum oldidan «Arsenal»ga qarshi Community Shield bahsida asosiy tarkibda maydonga tushdi. «Siti» 0:3 hisobida mag‘lub bo‘lgan uchrashuvdan so‘ng Husanovning o‘yini murabbiylar tomonidan tahlilga tortildi.
UEFA litsenziyasiga ega murabbiylar tahlilini e’lon qiladigan nashr o‘zbekistonlik futbolchini «Arsenal»ning dastlabki ikki goli bilan bog‘liq vaziyatlarda alohida qayd etdi.
Dastlabki gol 20 soniyada urildi
«Arsenal» hisobni uchrashuv boshlanishidan atigi 20 soniya o‘tib ochdi.
Myles Lewis-Skelly o‘ng qanotdan kelgan to‘pni Husanov va Ruben Dias orasidagi bo‘shliqqa yo‘lladi. Shu paytda Rikardo Kalafiori Husanov ortidan ichkariga qarab yugurdi.
Tahlilga ko‘ra, Husanov Kalafiorining harakatini yetarlicha kuzata olmagan va uning oldinga chiqishiga xalaqit berish imkoniyatidan foydalanmagan. Italiyalik futbolchi esa vaziyatdan unumli foydalanib, Janluiji Donnarummani mag‘lub etdi.
Ikkinchi gol ham Husanov joylashgan hududdan boshlandi
28-daqiqada «Arsenal» hisobni 2:0 ga yetkazdi. Martin Edigor o‘ng yarim qanotdan hech qanday jiddiy bosimsiz uzatma amalga oshirdi. Shu vaqtda Kristos Tzolis Husanovning orqa tomonidan jarima maydoniga yugurib kirdi.
Tahlilchilar fikricha, Husanov uning harakatini vaqtida sezmagan va uzatmaga mos ravishda o‘z pozitsiyasini o‘zgartira olmagan. Tzolis to‘pni boshi bilan markazga qaytardi, Kai Xavers esa vaziyatni golga aylantirdi.
«Arsenal» Husanov tomonidagi bo‘shliqlardan foydalandi
Nashr «Arsenal» butun uchrashuv davomida «Manchester Siti» himoyasidagi son ustunliklarini yaratishga uringanini ta’kidlagan. Xususan, londonliklar Husanovga qarshi 2 ga 1 vaziyatlarini yaratib, uning joylashgan hududidan hujumlarni rivojlantirgan.
Uchinchi golda ham shu kabi kombinatsiya ishladi. Tzolis ichkariga qarab harakatlanib Husanovni o‘ziga ergashtirdi, Kalafiori esa pastlikdan oldinga chiqdi. Edegor o‘z vaqtida jarima maydoniga kirib kelib, hisobni 3:0 ga yetkazdi.
Husanovning o‘zi ham hujum qurilishida ishtirok etdi
Tahlilda Husanovning faqat himoyadagi harakatlari emas, balki «Manchester Siti» to‘pga egalik qilganidagi roli ham ko‘rsatilgan. «Siti» hujum boshlagan paytda Husanov markazga yaqinlashib, Ruben Dias va Josko Gvardiol bilan birga uch himoyachidan iborat tuzilmani hosil qilgan. Mateo Kovachich esa ularning oldida tayanch yarim himoyachi sifatida joylashgan.
«Manchester Siti» uchrashuv davomida to‘pga 63 foiz egalik qilgan, biroq bundan gol chiqara olmadi. «Arsenal» esa 37 foiz to‘p nazoratiga qaramay, uchta gol urib, Community Shield sovrinini qo‘lga kiritdi.
Shu tariqa Abduqodir Husanov uchun mavsum oldidagi ilk katta sinov omadsiz yakunlandi. O‘zbekistonlik futbolchi «Arsenal»ning dastlabki ikki goliga olib kelgan epizodlarda xatolari bilan tahlil markazida qoldi.
Avvalroq Husanovning «Arsenal»ga qarshi o‘yinini «Sofascore» portali 6,9 ballga loyiq ko‘rgandi.
