To‘qqiz oy davomida qo‘shimcha ustama oladigan o‘qituvchilar ro‘yxati e’lon qilindi

Maktabgacha va maktab ta’limi vazirining tegishli buyrug‘i bilan vazir jamg‘armasi hisobidan har oy ustama oladigan 1 696 nafar malakali pedagogning ro‘yxati tasdiqlandi. Bu haqda vazirlik matbuot xizmati xabar berdi.

Mazkur ustama pedagoglarning kasbiy salohiyati va tanlov natijalariga ko‘ra aniqlangan g‘oliblarga to‘lanadi.

G‘oliblarning asosiy qismi maktab pedagoglari

Tanlovda g‘olib bo‘lganlarning eng katta qismini umumiy o‘rta ta’lim maktablarida faoliyat yuritayotgan pedagoglar tashkil etadi.

Ular quyidagicha taqsimlangan:

• umumiy o‘rta ta’lim maktablaridan – 1,4 ming nafar;
• ixtisoslashtirilgan ta’lim muassasalaridan – 98 nafar;
• maktabgacha ta’lim tashkilotlaridan – 198 nafar.

Shu tariqa jami 1 696 nafar pedagog vazir jamg‘armasi hisobidan beriladigan oylik ustamaga ega bo‘ladi.

To‘lovlar qachondan boshlanadi

G‘oliblarga ustama 2026-yil sentabr oyidan 2027-yil may oyigacha to‘lab boriladi. Ya’ni pedagoglar ushbu qo‘shimcha to‘lovni ketma-ket 9 oy davomida oladi.

Ustama miqdori pedagog faoliyat yuritayotgan ta’lim tashkiloti turiga qarab farqlanadi.

Umumta’lim pedagoglariga qancha beriladi

Umumiy o‘rta ta’lim va tegishli ta’lim tashkilotlari pedagoglariga har oy Mehnatga haq to‘lashning eng kam miqdorining 5,5 baravari miqdorida ustama belgilanadi.

Maktabgacha ta’lim tashkilotlarining g‘olib tarbiyachilariga esa har oy Mehnatga haq to‘lashning eng kam miqdorining 2 baravari miqdorida qo‘shimcha to‘lov amalga oshiriladi.

G‘oliblar ro‘yxatini qayerdan ko‘rish mumkin

Tanlovda g‘olib bo‘lgan 1 696 nafar pedagogning to‘liq ro‘yxati Maktabgacha va maktab ta’limi vazirligining rasmiy sahifasida e’lon qilingan.

Pedagoglar o‘z ismi-sharifi va faoliyat yuritayotgan ta’lim muassasasini ro‘yxatdan tekshirishi mumkin.

Avvalroq Kursiv Uzbekistan «Mehrli maktab»larda xodimlar ustamasi 200 foizga oshirilishi mumkinligi haqida yozgandi.