Samsung Galaxy Z Fold 8 foydalanuvchilaridan biri smartfonning ichki bukiluvchi ekranida noodatiy holatni aniqladi. Bu haqda Gizmochina nashri xabar bermoqda.
Qurilma egasining so‘zlariga ko‘ra, displeyning burchaklari yengil bosilganda biroz ichkariga egiladi yoki cho‘kib ketgandek ko‘rinadi.
Foydalanuvchi bu holatni ekran yuzasini yumshoq mato bilan artayotganida sezgan va Samsung’ning rasmiy forumida bu normal holatmi, degan savol bilan murojaat qilgan. Ijtimoiy tarmoqlarda ham shunga o‘xshash video muhokama qilinmoqda, biroq hozircha muammo bo‘yicha ommaviy shikoyatlar qayd etilmagan.
Muammo moslashuvchan ekran tuzilishi bilan bog‘liq bo‘lishi mumkin
Forumdagi muhokama ishtirokchilari ekran burchaklarining yumshoqligi bukiluvchi displey konstruksiyasi bilan bog‘liq bo‘lishi mumkinligini taxmin qilgan.
Ularning fikricha, displeyning chekka qismlaridagi qatlamlar markaziy qismga qaraganda kamroq qattiq bo‘lishi mumkin. Shu sababli yengil bosim ostida burchaklar biroz egilishi ehtimoldan xoli emas.
Foydalanuvchiga ekranni ataylab bosishda davom etmaslik va shubha tug‘ilgan taqdirda Samsung servis markaziga murojaat qilish tavsiya etilgan.
Samsung Galaxy Z Fold 8 mustahkamligi oshirilganini aytgan
Mazkur holat Samsung Galaxy Z Fold 8’ning mustahkamligi yaxshilangani haqidagi kompaniya bayonotlari fonida e’tibor tortmoqda.
Samsung modelda FlexTitanium texnologiyasidan foydalanadi. Unda OLED panel ostida titan plyonka va tayanch plastina joylashtirilgan. Bukilish mexanizmi esa ishlab chiqaruvchi ma’lumotiga ko‘ra, 500 ming marta ochib-yopishga mo‘ljallangan.
Bu yechimlar smartfonning kundalik foydalanishdagi chidamliligini oshirishga xizmat qilishi kerak.
Mustaqil sinovlarda ham ekran bo‘yicha savollar paydo bo‘lgan
Mustaqil chidamlilik sinovlari Galaxy Z Fold 8 umumiy hisobda jiddiy yuklamalarga bardosh bera olishini ko‘rsatgan.
Shu bilan birga, Galaxy Z Fold 8 Ultra ekstremal sinov vaqtida ichki ekrani ishlamay qolgan Samsung’ning ilk yirik bukiluvchi modellardan biri bo‘ldi.
Ichki displeyning yuqori qatlami avvalgidek yumshoq plastikdan tayyorlangan bo‘lib, u oson tirnalishi mumkin. Samsung foydalanuvchilarga zavodda o‘rnatilgan himoya plyonkasini olib tashlamaslik va ichki ekranga kuchli bosim bermaslikni tavsiya qiladi.
Samsung hozircha muammoni rasman tan olmagan
Hozircha Samsung Galaxy Z Fold 8 ekran burchaklarining yengil bosimda egilishi alohida texnik muammo ekanini rasman tasdiqlamagan.
Shuningdek, ayni holatning keng tarqalgan nuqson yoki faqat ayrim qurilmalarga xos xususiyat ekanini ko‘rsatadigan yetarli ma’lumot ham yo‘q.
Eslatib o‘tamiz, Kursiv Uzbekistan nashri avgust oyining eng unumdor smartfonlari e’lon qilingani haqida yozgan edi.
