General Motors Xitoydagi SAIC-GM-Wuling zavodida Chevrolet brendi uchun ishlab chiqilayotgan yangi elektr sedanining ilk tasvirini ko‘rsatdi. Hozircha avtomobilning nomi, texnik xususiyatlari va qachon sotuvga chiqishi ochiqlanmagan.
Avtomobil sirli tarzda namoyish qilindi
Yangi model General Motors va SAIC-GM-Wuling o‘rtasidagi kelajakdagi avtomobillar bo‘yicha yangi loyiha taqdimotida ko‘zga tashlangan. Rasmiy suratda avtomobilning katta qismi yopilgan bo‘lsa-da, uning sedan kuzoviga ega ekani ko‘rinadi.
GM South America prezidenti va boshqaruvchi direktori Tomas Ovsianyanskiyning Xitoyga tashrifi vaqtida olingan surat kompaniyaning yangi model bo‘yicha ilk rasmiy ishoralaridan biri bo‘ldi.
Chevrolet uchun yangi avlod model bo‘lishi mumkin
Kompaniya hozircha avtomobil haqida batafsil ma’lumot bermagan. Biroq uning kuzov proporsiyalari Chevrolet’ning rivojlanayotgan boshqa sedanlaridan farq qilishi va nisbatan yirikroq ko‘rinishi qayd etilmoqda.
Yangi avtomobil SAIC-GM-Wuling tomonidan Chevrolet uchun ishlab chiqilayotgan ilk elektr uch hajmli sedan bo‘lishi kutilmoqda.
Xitoydagi hamkorlik Chevrolet’ga yangi modellar beradi
General Motors so‘nggi vaqtlarda Xitoydagi hamkorlari bilan yangi avlod elektrlashtirilgan avtomobillar yaratishga katta e’tibor qaratmoqda.
SAIC-GM-Wuling bilan hamkorlik doirasida Chevrolet uchun nafaqat yangi sedan, balki boshlang‘ich toifadagi elektr xetchbek ham tayyorlanmoqda.
Yangi sedan hozircha Xitoy bozorida ham taqdim etilmagan. Shu sababli uning platformasi, quvvati, batareya sig‘imi va yurish masofasi bo‘yicha ma’lumotlar hozircha noma’lum.
Chevrolet’ning global elektr qatoriga qo‘shiladi
Yangi model kompaniyaning elektr transport vositalari qatorini kengaytirishga qaratilgan loyihalardan biri bo‘ladi. GM Xitoyda ishlab chiqiladigan avtomobillardan Chevrolet’ning xalqaro bozorlardagi mahsulot strategiyasida foydalanishni rejalashtirmoqda.
Avtomobilning rasmiy premyerasi, nomi, narxi va sotuv geografiyasi keyinroq e’lon qilinishi kutilmoqda.
Avvalroq Kursiv Uzbekistan Chevrolet Cobalt egalarining hafsalasini pir qilgani haqida yozgandi.
