Vivo kompaniyasi yangi Vivo X500 Pro Max smartfonining videotasvirga olish imkoniyatlarini namoyish etdi. Qurilma Zeiss Super Dynamic kamerasi, kengaytirilgan dinamik diapazon hamda Dolby Vision qo‘llab-quvvatlashi bilan ajralib turadi.
Vivo mahsulot menejeri Xan Bosyao smartfon murakkab yorug‘lik sharoitida qanday video suratga olishini ko‘rsatdi. Sinovda dengiz, quyosh botishi va qarshi yorug‘likda turgan inson yuzi bir kadrda tasvirga olingan.
Kengaytirilgan dinamik diapazon sinovdan o‘tkazildi
Kompaniya bir xil sahnani kengaytirilgan dinamik diapazon yoqilgan va o‘chirilgan holatda solishtirdi.
Vivo ma’lumotiga ko‘ra, bu funksiya yoqilganda X500 Pro Max bir vaqtning o‘zida kechki osmon tafsilotlarini ham, inson yuzining tabiiy rangini ham saqlab qolishga muvaffaq bo‘lgan.
Kompaniya yangi «kino rejimi» orqali foydalanuvchi videoni keyinchalik qo‘shimcha ishlov bermasdan ham sifatli natija olishi mumkinligini ta’kidlamoqda.
Dolby Vision va portret algoritmlari birga ishlaydi
Vivo X500 Pro Max’da ilk bor 4K aniqlikda soniyasiga 30 kadrli Dolby Vision videoni portret algoritmlari bilan bir vaqtda ishlatish imkoniyati paydo bo‘lishi aytilmoqda.
Avval yuqori sifatli video standarti va yuz terisini individual qayta ishlash funksiyalarini bir vaqtning o‘zida faollashtirish tizimga katta yuklama bergani sababli cheklangan edi.
Endi kompaniya Dolby Vision orqali yorug‘lik va soyalarni yanada aniqroq uzatishni, sun’iy intellekt asosidagi retush esa yuz rangini tabiiy saqlash va hajm hissini yaxshilashni va’da qilmoqda.
17 EV dinamik diapazon ta’kidlanmoqda
Kompaniya yangi videotasvir imkoniyatlarini Blueprint M900 sensori bilan bog‘lamoqda.
Vivo ma’lumotiga ko‘ra, mazkur sensor 17 EV gacha dinamik diapazonni ta’minlay oladi. Bu ayniqsa yorug‘ va qorong‘i hududlar bir kadrda uchraydigan murakkab sahnalarda tafsilotlarni yaxshiroq saqlashga xizmat qilishi kutilmoqda.
Avvalroq «Kursiv» Vivo V80 Lite 5G smartfonining yangi versiyasi chiqishi haqida yozgan edi.
