Serbiya parlamenti nega tarqatilib yuborildi

Serbiya prezidenti Aleksandar Vuchich parlamentni tarqatib yuborib, mamlakatda muddatidan oldin parlament saylovlarini o‘tkazish to‘g‘risidagi farmonni imzoladi. Ovoz berish 25-oktabr kuni bo‘lib o‘tadi.

Prezidentning qarori mamlakatda bir necha oydan beri davom etayotgan siyosiy inqiroz va hukumatga qarshi ommaviy norozilik namoyishlari fonida qabul qilindi.

Saylov 25-oktabrga belgilandi

Aleksandar Vuchich televideniye orqali qilgan murojaatida muddatidan oldin saylov o‘tkazilishi mamlakatdagi siyosiy inqirozdan chiqishga yordam berishiga umid bildirdi.

Uning aytishicha, Serbiya so‘nggi davrda jiddiy siyosiy beqarorlikni boshdan kechirdi. Prezident saylov natijalari xalqning xohish-irodasi va mamlakat kelajakda qaysi yo‘nalishda rivojlanishini aniq ko‘rsatishi kerakligini ta’kidladi.

Noroziliklar 2024-yildan beri davom etmoqda

Serbiyada talabalar yetakchiligidagi norozilik namoyishlari 2024-yil noyabridan beri davom etmoqda. Namoyishchilar Aleksandar Vuchichni korrupsiya va avtoritar boshqaruvda ayblab, uning iste’fosini talab qilmoqda.

Noroziliklarga mamlakat shimolidagi Novi Sad shahrida temiryo‘l vokzali konstruksiyasining qulab tushishi turtki bo‘lgan. Hodisa oqibatida kamida 16 kishi halok bo‘lgan.

Namoyishchilar qurilish ishlarining sifatsiz bajarilishiga korrupsiya sabab bo‘lganini da’vo qilmoqda. Dastlab ular fojia yuzasidan shaffof tergov o‘tkazilishini talab etgan bo‘lsa, keyinchalik talablar muddatidan oldin parlament saylovlarini o‘tkazishga qadar kengaydi.

Vuchich bosh vazirlikka da’vogarlik qilishi mumkin

Aleksandar Vuchich Serbiya siyosatida o‘n yildan ortiq vaqt davomida yetakchi mavqeni egallab kelmoqda. U avval bosh vazir, keyinchalik esa prezident sifatida mamlakatni boshqargan.

Amaldagi qonunchilikka ko‘ra, Vuchich yana bir prezidentlik muddatiga nomzodini qo‘ya olmaydi. Shunga qaramay, u kelgusida bosh vazir lavozimiga da’vogarlik qilish niyatida ekanini bildirgan.

Shu sababli 25-oktabrdagi muddatidan oldin saylov nafaqat parlament tarkibini, balki Serbiyaning keyingi siyosiy yo‘nalishini ham belgilab berishi mumkin.

Avvalroq «Kursiv» Belgraddagi bir ko‘chaga «Toshkent» nomi berilishi haqida yozgan edi.