Sindarov ustunlikni erta olsa, Gukesh qiynaladi — Karlsen shaxmat toji bahsi haqida
Norvegiyalik taniqli grossmeyster Magnus Karlsen O‘zbekiston vakili Javohir Sindarov va amaldagi jahon chempioni Gukesh Dommaraju o‘rtasidagi jahon chempionligi bahsiga munosabat bildirdi. Uning fikricha, uchrashuvning dastlabki partiyalarida kim hisobda oldinga chiqishi keyingi kurashga katta ta’sir ko‘rsatishi mumkin.
Karlsen erta ustunlikni hal qiluvchi omil deb biladi
Karlsenning ta’kidlashicha, agar Sindarov bahsning boshidayoq hisobda oldinga chiqsa, bu Gukesh uchun juda jiddiy muammoga aylanishi mumkin.
«Agar Sindarov dastlabki bosqichda oldinga chiqsa, bu Gukesh uchun juda yomon xabar bo‘ladi. Agar Gukesh boshida yetakchilikni qo‘lga olsa, u avtomatik tarzda yaqqol favoritga aylanadi. Bunday bahslar shunday ishlaydi», – dedi Karlsen.
Norvegiyalik shaxmatchi Gukeshning so‘nggi yillardagi o‘yiniga ham baho berdi. Uning fikricha, hindistonlik grossmeyster o‘z unvonini shunchaki «himoya qilayotgan» shaxmatchi sifatida emas, balki yana nimanidir qo‘lga kiritishga intilayotgan raqib sifatida o‘ynashi kerak.
Karlsen Gukesh 2024-yilda qulay sharoitda nihoyatda yuqori saviyada o‘ynay olishini namoyish qilganini ham qayd etdi.
Sindarov jahon chempionligi uchun kurashadi
Gukesh Dommaraju 2024-yil dekabrida Singapurda xitoylik Din Lijenga qarshi bahsda g‘alaba qozonib, tarixdagi eng yosh jahon chempioniga aylangan edi.
Javohir Sindarov esa 2026-yil 14-aprel kuni Kiprda o‘tkazilgan «Da’vogarlar turniri»da muddatidan oldin g‘olib chiqib, jahon shaxmat tojiga rasmiy da’vogar maqomini qo‘lga kiritdi.
Chempionlik bahsi Jenevada o‘tadi
Sindarov va Gukesh o‘rtasidagi jahon chempionligi uchrashuvi 24-noyabrdan 12-dekabrgacha Shveysariyaning Jeneva shahrida o‘tkazilishi rejalashtirilgan. Ikki yosh grossmeyster o‘rtasidagi ushbu qarama-qarshilik jahon chempionati tarixidagi eng «yosh» final sifatida qayd etilmoqda.
