Tesla Xitoydagi barcha Model 3’larni 16 dyuymli ekran bilan yangiladi
Tesla Xitoy bozoridagi barcha yangi Model 3 avtomobillarini 16 dyuymli markaziy ekran bilan jihozlay boshladi. Shuningdek, mamlakatdagi Model 3 va Model Y avtomobillarida 2,2 kVtgacha elektr energiyasini tashqi qurilmalarga uzatish funksiyasi paydo bo‘ldi. AQShdagi Model 3 esa bu yangilanishlardan hozircha chetda qoldi.
Model 3 kattaroq ekranga ega bo‘ldi
Tesla Xitoydagi barcha amaldagi Model 3 komplektatsiyalariga 16 dyuymli sensorli ekran o‘rnatishni boshladi. Avval avtomobil 15,4 dyuymli ekran bilan jihozlangan edi.
Kompaniya yangi displeyning aniqligi va yangilanish chastotasi yuqoriroq ekanini bildirgan, biroq ushbu ko‘rsatkichlarning aniq qiymatlarini oshkor qilmagan.
Bundan tashqari, Xitoydagi xaridorlar Model 3 uchun yangi och kulrang «premium» salon variantini ham tanlashi mumkin. Ushbu komplektatsiyada qora matoli shift qoplamasi qo‘llanadi.
Model 3 va Model Y’dan elektr energiyasi olish mumkin
Tesla Xitoyda sotilayotgan barcha Model 3 va Model Y avtomobillariga 2,2 kVtgacha o‘zgaruvchan tokni tashqi qurilmalarga uzatish imkoniyatini ham qo‘shdi.
Bu texnologiya avtomobilni vaqtinchalik quvvat manbai sifatida ishlatish imkonini beradi. Tesla misol tariqasida bir vaqtning o‘zida 600 vattli guruch pishirgich, 1 kVt quvvatli qozon va 600 vattli elektr choynakni ulash mumkinligini ko‘rsatgan.
Funksiyadan foydalanish uchun Tesla’ning maxsus AC quvvat chiqarish adapterini sotib olish kerak. Uch qatorli Model Y L bundan mustasno – unda adapter talab qilinmaydi.
AQShdagi Model 3 bu imkoniyatlardan mahrum
Xitoydagi yangilanishlar AQSh bozoridagi Model 3’ga hozircha tatbiq etilmagan. AQShda avtomobil hanuz 15,4 dyuymli markaziy ekran bilan taklif qilinmoqda.
Tesla AQShda avtomobildan tashqi qurilmalarni quvvatlantirish imkoniyatini avgust oyida ishga tushirgan. Biroq funksiya faqat Model Y Premium, Model Y Performance va Cybertruck uchun taqdim etilgan. AQShdagi Model 3’larning hech biri ushbu imkoniyatni olmagan.
Xitoyda esa V2L funksiyasi barcha yangi Model 3’lar uchun mavjud.
Tesla Xitoyda qo‘shimcha chegirmalarni ham taklif qilmoqda
Yangilanishlar bilan birga kompaniya Xitoydagi Model 3 uchun yangi rag‘batlantirish dasturini ham ishga tushirdi.
31-oktabrgacha berilgan buyurtmalar bo‘yicha xaridorlarga yakuniy to‘lovdan 5 ming yuan atrofida chegirma beriladi. Shuningdek, ayrim komplektatsiyalar uchun sug‘urta subsidiyasi, bo‘yoq uchun chegirma va boshqa imtiyozlar taklif qilinmoqda.
Chegirmalar hisobga olinganda Tesla Model 3’ni 222,5 ming yuan, ya’ni taxminan $33 mingdan xarid qilish mumkinligini e’lon qilgan. Biroq avtomobilning bazaviy narxi o‘zgarmagan – Model 3 RWD hanuz 235,5 ming yuan turadi.
Xitoy elektromobil bozorida Tesla mahalliy ishlab chiqaruvchilar bilan kuchli raqobat qilmoqda. Kompaniya yangi funksiyalar va chegirmalarni ushbu bozorda AQShga qaraganda tezroq joriy qilmoqda.
Avvalroq Xiaomi’ning yangi Xiaomi Skynomad N70 krossoveri Xitoyda sotuvga chiqarilgani haqida xabar berilgandi.
