Argentina terma jamoasining 22 yoshli yarim himoyachisi Niko Pas Lionel Messidan keyin 10-raqamli futbolkaning asosiy da’vogarlaridan biri sifatida ko‘rilmoqda. U Boliviyaga qarshi o‘rtoqlik uchrashuvida bir gol urib, yana bir golga assist berdi.
Niko Pas Ispaniyaning Santa-Krus-de-Tenerife shahrida tug‘ilgan. Uning otasi Pablo Pas ham futbolchi bo‘lgan va Argentina terma jamoasi safida 1998-yilgi jahon chempionatida qatnashgan.
Real Madrid tarbiyalanuvchisi
Pas 2016-yilda Real Madrid akademiyasiga qo‘shilgan. 2023/24-yilgi mavsumda u asosiy jamoada ham maydonga tushdi, biroq muntazam o‘yin amaliyotiga ega bo‘lmadi.
Keyinchalik futbolchi Italiyaning Como klubiga o‘tdi. Como dastlab uning huquqlarining 50 foizini 6 mln yevro evaziga sotib olgan.
Sesk Fabregas qo‘l ostida Pas 2024/25-yilgi mavsumda 35 uchrashuvda 6 gol urib, 8 ta golli uzatma berdi. Keyingi mavsumda esa 40 o‘yinda 13 gol va 7 assist qayd etdi.
Como futbolchini 60 mln yevro evaziga to‘liq sotib oldi
Manbaga ko‘ra, Como keyinchalik Niko Pasning transfer huquqlarini to‘liq sotib olish uchun 60 mln yevro to‘lagan. Shu bilan birga, Real Madrid futbolchini qaytarib olish imkoniyatini saqlab qolgan.
Kelishuvga ko‘ra, Madrid klubi 2027-yil yozida Pasni 80 mln yevro evaziga qaytarib olishi mumkin.
Futbolchining o‘zi esa shu yil iyun oyida faoliyatini yana bir mavsum Comoda davom ettirishga qaror qilganini ma’lum qilgan.
«Ko‘p hafta o‘ylab, faoliyatimning hozirgi bosqichida Como safida yana bir yil qolish eng yaxshi qaror degan xulosaga keldim», – degan Pas.
Argentinada 10-raqam alohida ahamiyatga ega
Shuningdek, o‘qing: Lionel Messi terma jamoani hali tark etmadi — tafsilotlar
Argentina terma jamoasida 10-raqam tarixan alohida o‘rin tutadi. Bu raqamni avval Diego Maradona, keyinchalik esa Lionel Messi kiygan.
Maradonadan keyin 10-raqam Marselo Galyardo, Ariel Ortega, Andres D’Alessandro va Xuan Roman Rikelme kabi futbolchilarga berilgan. Keyinchalik esa bu raqam uzoq yillar Messi bilan bog‘liq bo‘lib qoldi.
FIFA rasmiy turnirlarda barcha belgilangan raqamlardan foydalanishni talab qilgani sababli, terma jamoalar 10-raqamni butunlay muomaladan chiqarib tashlay olmaydi. Shu bois Messidan keyin bu raqam kimga berilishi Argentina futbolidagi asosiy savollardan biriga aylanmoqda.
Eslatib o‘tamiz, avvalroq Lionel Messi faoliyatidagi 930-golini urgani haqida xabar berilgandi. Argentinalik futbolchi MLS doirasida «San Diego»ga qarshi uchrashuvda jarima zarbasidan gol urdi.
