O‘zbekistonga Afg‘onistondan narkotik olib kirishga urinishlar davom etmoqda
O‘zbekistonga Afg‘onistondan katta miqdorda narkotik moddalarni noqonuniy olib kirishga urinishlar hamon davom etmoqda. Bu haqda Bojxona qo‘mitasi matbuot kotibi Husan Tangriyev ma’lum qildi.
«Haligacha Afg‘onistonda vaziyat yaxshilandi, deb ishonch bilan ayta olmaymiz», – dedi u.
Gashish qozonlar ichiga yashirilgan
Tangriyevning aytishicha, joriy yilda Afg‘onistondan olib kelinayotgan qozonlar ichiga yashirilgan bir necha yuz kilogramm gashishni O‘zbekistonga olib kirishga urinish aniqlangan.
Bojxona organlari narkotik moddalarni aniqlash va ularning noqonuniy aylanishining oldini olish bo‘yicha nazorat tadbirlarini davom ettirmoqda.
O‘tgan yili 612 kg narkotik aniqlangan
Bojxona qo‘mitasi vakili o‘tgan yili ham katta miqdordagi giyohvandlik vositalarini yashirincha olib kirishga urinish bo‘lganini eslatdi.
Xususan, 612 kilogramm giyohvandlik moddasi supurgi dastaklari ichiga yashirilgan holda O‘zbekistonga olib kirishga urinish vaqtida aniqlangan.
Avvalroq Kursiv Uzbekistan nashri Toshkent viloyatida kuchli ta’sir qiluvchi vositalar sotgan shaxs ushlangani haqida yozgan edi.
