Vaqti keldi — Ronaldu hamma sirni ochib tashladi
Krishtianu Ronaldu Portugaliya terma jamoasi yig‘inini nima sababdan tark etganiga batafsil izoh berdi. U 7-oktabr kuni Instagram’da e’lon qilgan qariyb 1 740 so‘zli bayonotida bosh murabbiy Jorge Jesus ikki marta bergan va’dasini bajarmaganini aytdi. Ronaldu bu holat uning terma jamoa qarorgohini tark etishiga sabab bo‘lganini bildirdi.
Murabbiy o‘z so‘zida turmagan
Ronalduga ko‘ra, Jesus dastlab unga Norvegiya va Daniyaga qarshi uchrashuvlarda qatnashmaslik, shu orqali jismoniy holatini asrash rejasini taklif qilgan.
Biroq Norvegiyaga qarshi o‘yin kuni murabbiy futbolchiga ikkinchi bo‘limda taxminan 30 daqiqa maydonga tushishi mumkinligini aytgan. Ronaldu tanaffusdan boshlab qizigan, biroq oxir-oqibat maydonga tushirilmagan.
«Men tanaffusdan boshlab qizidim, daqiqalar o‘tishini kuzatdim, ammo meni maydonga chaqirishmadi», – deya yozdi Ronaldu.
Futbolchi aynan shu holatni murabbiyning birinchi va’dasini buzishi sifatida baholagan.
Sakkiz banddan iborat bayonot tayyorlangan
Ronaldu keyinchalik Jesus bilan uchrashuv bo‘lib, yuzaga kelgan vaziyatni matbuot anjumanida tushuntirish bo‘yicha kelishuvga erishilganini aytdi.
Uning so‘zlariga ko‘ra, buning uchun sakkiz banddan iborat hujjat tayyorlangan. Unda Ronaldu murabbiyning qarorlariga hech qachon aralashmagani, namunali, sodiq va professional futbolchi bo‘lgani qayd etilishi kerak edi.
Hujjatdagi bandlardan birida Jesus Norvegiyaga qarshi uchrashuvda Ronalduga qizish imkonini berib, keyin maydonga tushirmagani xato bo‘lganini tan olishi ko‘zda tutilgan.
Biroq Ronaldu bayonotiga ko‘ra, murabbiyning keyingi matbuot anjumanidagi gaplari ular kelishgan mazmunga mos kelmagan.
«Bu uning menga bergan va’dasini ikkinchi marta buzishi edi», – deb yozdi futbolchi. Shundan so‘ng u yana bir va’da buzilishini kutmasdan yig‘inni tark etishga qaror qilganini bildirdi.
Avvalroq Portugaliya futbol federatsiyasi prezidenti Pedro Proensa Krishtianu Ronaldu hamon terma jamoa rejalarida ekanini bildirgandi.
