BMW bir quvvatlanishda 828 km yuradigan yangi elektromobilini taqdim etdi
BMW kompaniyasi yangi to‘liq elektr quvvatida harakatlanadigan iX4 krossover-kupe modelini taqdim etdi. Avtomobilning BMW iX4 50 xDrive versiyasi WLTP sinov sikli bo‘yicha bir quvvatlanishda 828 km masofani bosib o‘tishi mumkin. Bu haqda BMW Group rasmiy sayti xabar berdi.
BMW iX4 qachon sotuvga chiqadi
Kompaniya ma’lumotiga ko‘ra, BMW iX4’ning dastlabki ikki versiyasini 2027-yil mart oyidan buyurtma qilish mumkin bo‘ladi. Keyinroq modelning eng kuchli M60 xDrive modifikatsiyasi ham qatorga qo‘shiladi.
BMW iX4 50 xDrive ikkita elektr motoriga ega bo‘lib, umumiy quvvati 469 ot kuchini tashkil etadi. Avtomobil 0 dan 100 km/soat tezlikka 4,9 soniyada erishadi. Uning batareyasining foydalanish mumkin bo‘lgan sig‘imi 108,7 kVt·soatni tashkil qiladi.
Ikkinchi versiya — BMW iX4 40 xDrive — 374 ot kuchiga ega. U 100 km/soat tezlikka 5,6 soniyada chiqadi va WLTP sikli bo‘yicha 638 km gacha masofani bosib o‘tishi mumkin.
10 daqiqada 387 km yurishga yetadigan quvvat
BMW iX4 50 xDrive 400 kVt gacha quvvat bilan tezkor zaryadlashni qo‘llab-quvvatlaydi. Kompaniya ma’lumotiga ko‘ra, mos zaryadlash stansiyasida 10 daqiqada yana 387 km yurishga yetadigan energiyani to‘plash mumkin.
Biroq bu ko‘rsatkich ideal sharoitdagi WLTP hisob-kitobiga asoslangan. Amaldagi masofa ob-havo, haydash uslubi, yo‘l sharoiti, avtomobil yuklamasi va batareya holatiga qarab farq qilishi mumkin.
Eng kuchli versiya 612 ot kuchiga ega bo‘ladi
BMW iX4 M60 xDrive modelining maksimal quvvati 612 ot kuchini tashkil etadi. U 0 dan 100 km/soat tezlikka 3,9 soniyada erishishi, maksimal 240 km/soat tezlikda harakatlanishi mumkin.
Kompaniya ushbu versiya uchun 777 km gacha masofani ko‘rsatgan. Bu raqamlar hozircha dastlabki hisob-kitoblar bo‘lib, yakuniy homologatsiya natijalari bilan farq qilishi mumkin.
Avvalroq Mercedes-Benz kompaniyasining 2026-yil uchinchi choragidagi asosiy avtomobil savdolari yillik hisobda 8 foizga kamayib, 407 200 donani tashkil etgani haqida xabar berilgandi.
