Papa Leo XIV o‘pkasidagi tugunni olib tashlatadi

Rim papasi Leo XIV yaqin kunlarda o‘pkasida aniqlangan tugunni olib tashlash uchun jarrohlik amaliyotini boshdan kechiradi. Bu haqda u Vatikandagi Avliyo Pyotr maydonida yakshanba kungi murojaatida ma’lum qildi.

Papa shifokorlar tekshiruvi vaqtida o‘pkasida kichik tugun aniqlanganini, u juda erta bosqichda va cheklangan hududda ekanini aytdi.

Operatsiya yaqin kunlarda o‘tkaziladi

«So‘nggi tibbiy tekshiruvlar vaqtida o‘pkamda tugun aniqlandi. U juda erta bosqichda va juda mahalliy holatda topildi», – dedi Leo XIV.

Uning aytishicha, shifokorlar jarrohlik aralashuvini ma’qul deb hisoblagan.

«Shifokorlar maslahati bilan uni olib tashlash bo‘yicha operatsiya qilishga qaror qildim. Amaliyot yaqin kunlarga rejalashtirilgan», – dedi papa.

Bu Leo XIV uchun ilk jiddiy tibbiy holat

Bu 2025-yilda Rim papasi etib saylangan Leo XIV uchun lavozimga kirishganidan buyon qayd etilgan ilk jiddiy sog‘liq bilan bog‘liq holat hisoblanadi.

Manbada aytilishicha, o‘pka tuguni odatda diametri 3 santimetrdan kichik bo‘lgan chegaralangan o‘zgarish bo‘lib, u har doim ham xavfli bo‘lavermaydi.

Amerika Torakal jamiyati ma’lumotiga ko‘ra, o‘pka tugunlarining 5 foizdan kamrog‘i saraton bilan bog‘liq bo‘lib chiqadi.

Papa faol hayot tarzini davom ettirmoqda

Leo XIV 71 yoshda. Unga qadar Rim papasi bo‘lgan Fransisk bu lavozimni egallaganida undan besh yosh katta edi, Benedikt XVI esa 78 yoshda papa bo‘lgan.

Hozirgacha Leo XIV’da jiddiy sog‘liq muammolari borligi haqida ma’lumot berilmagan. U faol turmush tarzini olib borishi bilan tanilgan.

Avvalroq «Kursiv» Donald Tramp Rim papasini keskin tanqid qilgani haqida yozgan edi.