Yunusobod tumanida 600 dan ortiq xonadon gazsiz qoladi

Toshkent shahrining Yunusobod tumanida yuqori bosimli yerosti gaz quvurida ta’mirlash ishlari olib borilishi sababli 19-oktabr, 2026-yil kuni ayrim hududlarda tabiiy gaz ta’minoti vaqtincha to‘xtatiladi. Bu haqda «Hududgaz Poytaxt» gaz ta’minoti filiali matbuot xizmati ma’lum qildi.

Ta’mirlash ishlari va muddati

«Yunusobodtumangaz» gaz ta’minoti bo‘limi mutaxassislari tomonidan tumanning «Obod» mahalla fuqarolar yig‘ini (MFY) hududidan o‘tgan D-325 millimetrli yerosti yuqori bosimli gaz quvurini kesish ishlari amalga oshirilishi rejalashtirilgan. Shu munosabat bilan mazkur sanada soat 09:00 dan 18:00 gacha gaz uzatish to‘xtatiladi.

Gazsiz qoladigan hududlar va obyektlar

Cheklovlar «Posira» MFYdagi 4 ta ko‘p qavatli uyda joylashgan 515 ta xonadon hamda «Obod» MFYdagi 120 ta yerli xonadonga ta’sir qiladi.

Shuningdek, ushbu mahallalardagi 32 ta ulgurji iste’molchi, Bolalar uyi hamda «EDEM», «Dream Gaz» va «TRIUMPH ORIENTIR» avtomobillarga gaz to‘ldirish kompressor shoxobchalari (AGNKS) vaqtincha gaz ta’minotidan uziladi. Ta’mirlash ishlari yakunlanganidan so‘ng tabiiy gaz ta’minoti bosqichma-bosqich qayta tiklanadi.

Avvalroq Kursiv nashri Mirzo Ulug‘bek tumanida 1 706 ta xonadon vaqtincha gazsiz qolishi haqida xabar bergan edi.