Fransiyadagi norozilik namoyishlari ortidan Makron xalqqa murojaat qildi
Fransiya prezidenti Emmanuel Makron mamlakat bo‘ylab o‘tgan norozilik namoyishlaridagi zo‘ravonliklarni qoraladi, deya xabar berdi France 24. Tartibsizliklar vaqtida qariyb 2,4 ming kishi hibsga olindi, mingga yaqin politsiya va jandarmeriya xodimi jarohatlandi.
Fransiyada yashash xarajatlarining oshishi va maktablardagi sharoitlardan norozi yuz minglab odamlar ko‘chalarga chiqdi.
Ayrim hududlarda namoyishchilar politsiya bilan to‘qnashdi, do‘konlar talandi va binolarga zarar yetkazildi. Ichki ishlar vazirligi ma’lumotiga ko‘ra, qariyb ming nafar huquq-tartibot xodimi jarohatlangan, ulardan yetti nafarining ahvoli og‘ir.
«Zo‘ravonlikni hech narsa oqlamaydi», – dedi Makron xalqqa murojaatida.
U qonuniy talablar bilan namoyishga chiqqan fuqarolarni do‘konlarni talagan va mulkka zarar yetkazgan guruhlardan ajratish kerakligini ta’kidladi.
Ayrim namoyishlar taqiqlanishi mumkin
Makron mahalliy hokimiyatlarga zarur bo‘lsa, yaqin kunlarda ayrim yig‘ilishlarni taqiqlash imkoniyati berilishini aytdi.
Shu bilan birga, prezident favqulodda holat yoki komendantlik soati kabi keskin choralarni e’lon qilmadi.
«Bugun kechqurun barchamiz g‘azab va uyatni his qilyapmiz», – dedi Fransiya prezidenti.
U tartibsizliklarda aybdor bo‘lganlarga nisbatan qat’iy choralar ko‘rilishini bildirdi.
Parijda yangi to‘qnashuvlar yuz berdi
Yakshanba kuni Parijdagi Respublika maydonida ham yuzlab odamlar to‘plandi. Rasmiylarga ko‘ra, ushbu yig‘ilish tasdiqlanmagan.
Politsiya ko‘zdan yosh oqizuvchi gaz va shovqinli granatalardan foydalandi. Namoyishchilar esa politsiyaga shisha va toshlar uloqtirdi.
Parijda 42 kishi hibsga olindi, Respublika maydoni atrofidagi kamida beshta do‘kon talandi. Lion shahrida ham politsiya bilan to‘qnashuvlar va do‘konlarni talashga urinishlar qayd etildi.
Ikki o‘smir jiddiy jarohatlandi
Sent-Etyen shahrida 17 yoshli o‘smir tartibsizliklarni bostirish uchun ishlatiladigan granata portlashi oqibatida o‘ng qo‘lidan ayrildi.
Myuluzda esa 17 yoshli qiz ko‘zidan jarohat olib, bir ko‘zini yo‘qotgani prokuratura tomonidan ma’lum qilindi. Limoj shahrida XIX asrda qurilgan meriya binosi yondirildi. Lion markazidagi turizm idorasiga ham o‘t qo‘yildi.
Makron xavfsizlik choralarini qayta ko‘rib chiqishni topshirdi
Prezident ichki ishlar vaziri Loran Nunesga namoyishlar vaqtida yuzaga kelgan vaziyatdan xulosa chiqarish, ayniqsa razvedka ma’lumotlarini yig‘ish va tartibsizliklarni oldindan baholash tizimini qayta ko‘rib chiqishni topshirdi.
Makron, shuningdek, zarar ko‘rgan bizneslarni qo‘llab-quvvatlash va xavfsizlik kuchlarining harakatlari bo‘yicha to‘liq ochiqlik ta’minlanishini va’da qildi.
