Tel-Avivdan Venaga uchgan samolyot bomba tahdidi sabab Sofiyaga qo‘ndi

Tel-Avivdan Venaga uchayotgan Austrian Airlines samolyoti bortda bomba borligi haqidagi xabar sabab Bolgariya poytaxti Sofiyaga favqulodda qo‘ndi. Bu haqda Bolgariya davlat axborot agentligi xabar berdi.

Samolyotda 51 yo‘lovchi va olti nafar ekipaj a’zosi bo‘lgan

Bolgariya Transport va kommunikatsiyalar vazirligi ma’lumotiga ko‘ra, samolyot Ruminiya chegarasi yaqinida bo‘lgan paytda ekipaj portlash tahdidi haqidagi xabarni olgan va Sofiyaga qo‘nishga qaror qilgan.

Airbus A320 samolyotida 51 yo‘lovchi va olti nafar ekipaj a’zosi bo‘lgan. Samolyot bortida BMTda chiqish qilishi kerak bo‘lgan yoshlar delegatsiyasi ham bo‘lgan.

Samolyot xavfsizlik tekshiruvidan o‘tkazilmoqda

Hozirda havo kemasi xavfsizlik xizmatlari tomonidan tekshirilmoqda. Tekshiruv yakunlangach, yo‘lovchilar Venaga boshqa reys orqali jo‘natilishi rejalashtirilgan. Tashuvchi kompaniya tekshiruvlar yakunlangach barcha yo‘lovchilar Venaga boshqa reys bilan jo‘natilishini ma’lum qildi.

Avvalroq «Kursiv» joriy yil 30-sentabr kuni Dubaydan Tel-Avivga uchayotgan Flydubai aviakompaniyasi samolyotining ikkinchi uchuvchisi terakt amalga oshirishga uringani haqida yozgan edi.