O‘zbekistonda 2,84 mln kishi kredit olishni o‘ziga taqiqladi
2026-yil 1-oktabr holatiga ko‘ra, O‘zbekistonda 2 841 475 nafar fuqaro «Kreditga taqiq» xizmatiga ulangan. Ulardan 1,66 mln nafari erkaklar, 1,18 mln nafari ayollardir. Xizmat fuqarolarga nomidan kredit rasmiylashtirilishining oldini olish uchun taqiqni mustaqil ravishda yoqish yoki o‘chirish imkonini beradi. Bu haqda Kredit-axborot tahliliy markazi (KATM) ma’lum qildi.
Xizmatdan qancha erkak va ayol foydalanmoqda
KATM e’lon qilgan statistikaga ko‘ra, xizmatga ulangan fuqarolarning gender bo‘yicha taqsimoti quyidagicha:
- Erkaklar — 1 656 387 nafar;
- Ayollar — 1 185 088 nafar.
Jami foydalanuvchilar soni 2,84 mln nafardan oshgan.
«Kreditga taqiq» xizmatini qanday yoqish mumkin
Fuqarolar xizmatni onlayn yoki oflayn shaklda faollashtirishi va o‘chirishi mumkin.
Onlayn usullar:
- KATM mobil ilovasi orqali: bosh sahifadagi «Kreditga taqiq» bo‘limini tanlash;
- Kredit byurosi portali orqali: shaxsiy kabinetga kirish;
- my.gov.uz orqali: kredit bitimini tuzishga taqiq qo‘yish yoki taqiqni olib tashlash xizmatidan foydalanish.
Oflayn usul: mamlakatdagi Davlat xizmatlari markazlariga yoki KATM Kredit byurosiga shaxsan murojaat qilish mumkin.
Xizmat bepul
«Kreditga taqiq» xizmatidan foydalanish mutlaqo bepul. Uni faollashtirish orqali fuqaro o‘z nomiga kredit rasmiylashtirishga nisbatan qo‘shimcha himoya chorasi qo‘llashi mumkin.
Eslatib o‘tamiz, 2027-yil 10-yanvardan O‘zbekistonda banklar mijozning roziligisiz kredit yoki kafillik bo‘yicha to‘lovlarni undirishda uning bank kartasida mehnatga haq to‘lashning eng kam miqdorining kamida yarmiga teng pulni saqlab qolishi shart bo‘lishi haqida xabar berilgandi.
