Yangiliklar

Toshkent shahrida uy-joy ijarasi narxlari biroz arzonlashmoqda. 2025-yil yanvar oyida oʻrtacha ta’mirlangan kvartiralarning ijara bahosi dekabr oyiga nisbatan 0,1 foizga, toʻliq ta’mirlangan uylarning narxi esa 0,3 foizga pasaydi.

Oʻrtacha ta’mirlangan 1 va 2 xonali kvartiralarning ijara narxi mos ravishda 0,3 foiz va 0,4 foizga tushgan boʻlsa, 3 va 4 xonali uylar uchun aksincha, biroz oshgan – 0,1 foiz va 0,3 foizga.

Eng arzon ijara takliflari:

Oʻzbekistonda Milliy gvardiyaning vakolatlari kengaytirildi. Endilikda gvardiya xodimlari ma’muriy huquqbuzarliklar boʻyicha ishlarni koʻrib chiqish va tegishli jazo choralarini qoʻllash huquqiga ega boʻldi.

Bu oʻzgarish Ma’muriy javobgarlik toʻgʻrisidagi kodeksga kiritilgan qoʻshimchalar asosida amalga oshirildi. Yangi qonunga muvofiq, Milliy gvardiya voyaga yetmaganlar oʻrtasida huquqbuzarliklarning oldini olish borasidagi faoliyatini yanada kengaytiradi. Qonun rasmiy e’lon qilingan kundan boshlab kuchga kiradi.

Avvalroq Kursiv Uzbekistan 2023-yilda voyaga yetmaganlar oʻrtasida 3,5 mingta jinoyat qayd etilgani, shundan 2,28 ming maktab oʻquvchilari tomonidan qilingani haqida xabar bergan edi.

2024-yilda Oʻzbekistonda 1 milliard chek boʻyicha isteʼmolchilarga 1 trillion soʻmdan ortiq keshbek qaytarildi, deb xabar berdi Soliq qoʻmitasi matbuot xizmati.

Ta’kidlanishicha, dekabr oyida 89,2 milliard soʻm tasdiqlangan. Eng koʻp keshbek Toshkent shahrida qayd etilib, umumiy summa 412,2 milliard soʻmni tashkil qildi. Yetakchilar qatorida Toshkent viloyati (107,1 milliard soʻm) va Samarqand viloyati (93,2 milliard soʻm) ham bor.

Sirdaryo va Jizzax viloyatlarida esa koʻrsatkichlar nisbatan past boʻlib, mos ravishda 15,5 milliard va 22,5 milliard soʻmni tashkil etdi.

Avvalroq «Kursiv» Oʻzbekistonda iste’molchilarga toʻqqiz oyda 717,8 mlrd soʻm keshbek toʻlangani haqida xabar bergan edi.

«Yevro-5» va undan yuqori ekologik talabga mos yuk avtomobillari yana uch yilga (2028-yilgacha) bojxona boji va utilizatsiya yigʻimidan ozod qilinishi belgilandi. Bu haqda xizmat koʻrsatish sohalarini rivojlantirish boʻyicha Shavkat Mirziyoyev raisligidagi videoselektor yigʻilishida ma’lum qilindi.

2024-yilda transport xizmatlari hajmi 8,6 foizga oshib, 145 trillion soʻmga yetdi, lekin bu iqtisodiy oʻsish uchun yetarli emasligi qayd etildi. Mahalliy ekspeditorlar QQS toʻlovidan ozod qilinib, ularning xalqaro yuk tashishdagi ulushi 2024-yilda 25 foizga, 2026-yilgacha esa 50 foizga yetkazilishi belgilandi.

Shuningdek, xususiy aviakompaniyalar bilan hamkorlikda Samarqand, Buxoro, Urganch, Nukus va Termizga parvozlar soni ikki baravar oshirish, havo qatnovlari hajmi 20 foizga oshirilib, 15 million...

Prezident Shavkat Mirziyoyev 7-fevral kuni xizmat koʻrsatish sohalarini rivojlantirish boʻyicha videoselektorda onlayn kredit olish tartibini soddalashtirish boʻyicha yangi qaror ishlab chiqishni mutasaddilarga topshirdi.

Yigʻilishda moliyaviy xizmatlar hajmini 30 foizga oshirish boʻyicha aniq rejalar belgilandi. Shuningdek, davlat banklarining onlayn xizmatlar boʻyicha rivojlanish sur’ati xususiy banklardan ortda qolayotgani qayd etildi.

2024-yilda xususiy banklarda 2024-yilda masofaviy xizmatlardan foydalanuvchilar soni 32 foizga oshgan. Davlat banklarida esa bu koʻrsatkich atigi 13 foizni tashkil etgan.

Shuningdek, banklar joriy yilda masofaviy xizmat koʻrsatishni kamida 30 foizga oʻstirishi muhimligi ta’kidlandi.

Eslatib oʻtamiz, Markaziy bank tomonidan 2025-yil 1-aprelgacha banklarda onlayn kredit ajratish boʻyicha vaqtinchalik tartib yoʻlga qoʻyilgandi.

«Manchester Siti» chempionlar ligasi joriy mavsumining ikkinchi qismi uchun roʻyxatdan oʻtkazilgan futbolchilar roʻyxatini e’lon qildi.

Qishki transferlar oyinasida klubga qo‘shilgan Abduqodir Husanov ham mazkur roʻyxatdan joy oldi. Shuningdek, yangi qoʻshilgan oʻyinchilardan Omar Marmush va Niko Gonsales ham UEFAga topshirilgan tarkibga kiritildi. Jarohatda bo‘lgan Rodri ham roʻyxatdan oʻrin olgan.

Eslatib oʻtamiz, 11-fevral kuni «Manchester Siti» «Real Madrid»ga qarshi oʻtish oʻyinida maydonga tushadi. Javob uchrashuvi esa 19-fevralda Madridda boʻlib oʻtadi.

Avvalroq «Kursiv» Oʻzbekiston elchisi «Manchester Siti» himoyachisi Abduqodir Husanov bilan uchrashgani haqida xabar bergan edi.

Oʻzbekistonda banklar avtokredit ajratishda avtomobillarga taqdim etilayotgan chegirmalarni hisobga olishni boshlaydi. Bu haqda 7-fevral kuni xizmat koʻrsatish sohalarini rivojlantirish boʻyicha Shavkat Mirziyoyev raisligidagi videoselektor yigʻilishida maʼlum qilindi.

Hozirda koʻplab avtosalonlar mijozlar avtomobil narxini toʻliq toʻlaganda chegirma taqdim etmoqda. Biroq kredit asosida sotib olinadigan avtomobillarga ushbu chegirmalar tatbiq etilmaydi, chunki amaldagi qoidalar bunga yoʻl qoʻymaydi.

Agar banklarga ushbu chegirmalarni inobatga olish ruxsat etilsa, avtokredit stavkalari 4 foizgacha arzonlashishi mumkin. Prezident bu cheklovni mahalliy avtomobillar uchun bekor qilish zarurligini taʼkidladi.

Shuningdek, yigʻilishda xizmatlar koʻlamini kengaytirish uchun taksi agregatorlaridan biri 2 mingta avtomobil kreditiga kafil boʻlib, 4 ming odamni ishli qilish taklifi...

Ijtimoiy tarmoqlarda prezident ma’muriyatining hajmi 50 foizga qisqarishi, boʻlimlarda xodimlar soni qisqarishi haqida rasman tasdiqlanmagan ma’lumotlar tarqalmoqda, dedi davlat rahbari matbuot kotibi Sherzod Asadov.

Asadov xodimlarni optimallashtirish barcha davlat organlarida amalga oshirilayotgan doimiy jarayon ekanligini ta’kidladi.

Bunda takrorlanadigan funksiyalarni qisqartirish, davlat boshqaruvi tizimi va mansabdor shaxslar faoliyatini takomillashtirish ustuvor vazifa hisoblanadi.

«Bu jarayonning koʻlami tegishli tadqiqot va tahlillar oʻtkazilgandan keyingina aniq boʻladi», – deya qoʻshimcha qildi matbuot kotibi.

Shuningdek, u blogerlar va ommaviy axborot vositalarini ushbu masala yuzasidan xabar berishda rasmiy manbalarga tayanishga chaqirdi.

Avvalroq Kursiv Uzbekistan xufiyona faoliyat yuritib, «konvertda» oylik to‘layotgan tadbirkorlar...

Uzum Bank Kuzatuv kengashining qaroriga ko‘ra, Svetlana Xe bankning yangi boshqaruv raisi etib tayinlandi. U o‘z lavozimidagi faoliyatini O‘zbekiston Respublikasi Markaziy banki bilan kelishilgandan so‘ng boshlaydi.

Bankning amaldagi boshqaruv raisi Aleksandr Filippovich esa Uzum Fintech’ning birlashgan yo‘nalish operatsion direktori sifatida faoliyatini davom ettiradi.

Svetlana Xe bank sohasida 20 yildan ortiq tajribaga ega bo‘lib, korporativ boshqaruv, mijozlarga xizmat ko‘rsatish hamda bank mahsulotlarini rivojlantirish yo‘nalishlariga e’tibor qaratib kelgan.

U Uzum Bank jamoasiga qo‘shilishdan avval Yangi Bank boshqaruv raisi, shuningdek, Octobank va Kapitalbank kabi yirik moliyaviy tashkilotlarda rahbarlik lavozimlarida ishlagan.

Avvalroq Kursiv Uzbekistan Uzum 2024-yilda 1,2 trillion so‘m soliq to‘lagani haqida xabar...

Sony Interactive Entertainment Worldwide Studios kompaniyasining sobiq rahbari Shoun Layden PlayStation 6 o‘yin konsoli haqida o‘z fikrlarini bildirdi. Unga ko‘ra, Sony kelajakdagi konsolida optik disk drayverini saqlab qolishi mumkin. Bu haqda Techradar.com nashri ma’lum qildi.

Laydenning ta’kidlashicha, Sony dunyo bo‘ylab foydalanuvchilarning ehtiyojlarini inobatga olish majburiyatiga ega, chunki ko‘plab davlatlarda yuqori tezlikdagi internetdan foydalana olish imkoniyati cheklangan. Kompaniyaning asosiy savollardan biri shuki:

«Agar biz disklardan voz kechsak, bozorimizning qanchalik katta qismini yo‘qotamiz? Masalan, Italiya yoki boshqa mamlakatlarning qishloq joylarida yashovchi foydalanuvchilar raqamli o‘yinlarni yuklab olish uchun yetarlicha sifatli internetga ega bo‘ladimi?»

Layden, shuningdek, sayohatlarda konsol...

7-fevral kuni AQSh dollarining rasmiy kursi 12,84 soʻmga tushib, 12 957,00 soʻmni tashkil etdi. Bu haqda Markaziy bank axborot xizmati xabar berdi.

Mamlakatdagi tijorat banklari bir AQSh dollarini 12 895 – 12 960 soʻmdan sotib olayotgan boʻlsa, 12 970 – 13 030 soʻm oraligʻida sotmoqda.

Shu bilan birga, yevro 26,87 soʻmga ortib, 13 463,62 soʻmga yetdi. Rossiya rubli esa 0,54 soʻmga tushib, 133,43 soʻmga teng boʻldi.

Kursiv Uzbekistanʼga sharh bergan tahlilchilarning fikricha, yil oxirigacha AQSh dollari 13 700 – 13 800 soʻmga yetishi mumkin. 

Xitoyning Xarbin shahrida o‘tayotgan qishki Osiyo o‘yinlarida O‘zbekiston sharafini himoya qilayotgan short-trekchimiz Daniil Yeybog yana ikki yo‘nalishda startga chiqib, chorak finalga yo‘l oldi. Bu haqda Olimpiya qo‘mitasi ma’lum qildi.

500 metr masofada u saralash bosqichini 41,143 soniyada yakunlab, o‘z guruhida ikkinchi o‘rinni egalladi. 1000 metr masofada esa sportchimiz 1 daqiqa 29,268 soniya natija qayd etib, yana ikkinchi bo‘ldi va navbatdagi bosqichga yo‘l oldi.

Avvalroq Kursiv Uzbekistan «Xarbin – 2025» Osiyo o‘yinlarida ishtirok etadigan O‘zbekistonning tarkibi e’lon qilingani haqida xabar bergan edi.

2025-yil 4-fevral kuni «Kapitalbank» ATB Kuzatuv kengashi bankning Boshqaruv tarkibini kengaytirish to‘g‘risida qaror qabul qildi. Bank Boshqaruvi raisining o‘rinbosari lavozimiga Ulug‘bek Tavakkalov tayinlandi. Bu haqda Kapitalbank matbuot xizmati ma’lum qildi.

Ulug‘bek Tavakkalov 20 yildan ortiq vaqt davomida mamlakat bank sohasida faoliyat yuritib kelmoqda. O‘z mehnat faoliyati davomida u yirik banklarda kredit portfellarini boshqarish, chakana biznesni rivojlantirish va bank mahsulotlarini raqamlashtirish jarayonlarini muvaffaqiyatli boshqargan.

Ulug‘bek Tavakkalov «Kapitalbank» ATB Boshqaruvi raisining o‘rinbosari sifatida bankning chakana yo‘nalishini strategik rivojlantirishga e’tibor qaratadi va millionlab mijozlar uchun moliyaviy mahsulotlar yaratish vazifasini o‘z zimmasiga oladi.

«Joriy yilda biz xizmatlar sifati...

«Konvertda» maosh beruvchi, xufiyona faoliyat yuritayotgan tadbirkorlar ustidan nazorat kuchaytiriladi. Bu haqda prezident Shavkat Mirziyoyev videoselektor yig‘ilishida ma’lum qildi.

Bugun davlat rahbari raisligida xizmat ko‘rsatish sohalarini rivojlantirish bo‘yicha asosiy vazifalar muhokamasi yuzasidan videoselektor yig‘ilishi boshlandi.

Uning so‘zlariga ko‘ra, qurilish, savdo va umumiy ovqatlanish korxonalariga ishchilar bilan qisqa muddatli, soddalashgan (kunbay, ishbay) mehnat shartnomasini tuzishga ruxsat beriladi.

Ikki yil oldin savdo va xizmatlar sohasidagi korxonalarga ijtimoiy soliq 1 foiz qilib belgilandi. O‘tgan davr mobaynida korxonalar soni 1,5 karra oshib, ularda ishchilar soni 220 mingga ko‘paydi.

Muhimi, ko‘plab korxonalar «soya»dan chiqib, ish haqi rasmiy ko‘rsatila boshladi, natijada ish haqi 3,2 karra...

General Motors kompaniyasi 2026-yilgi Chevrolet Corvette ishlab chiqarish sanasini rasman e’lon qildi. Mashhur superkar modelining yangi avlodi 2025-yilning 2-iyunidan konveyerdan chiqishni boshlaydi, buyurtmalar esa 13-apreldan qabul qilinadi. Bu haqda 21cars nashri ma’lum qildi.

2026-yil uchun Chevrolet Corvette to‘rtta variantda ishlab chiqariladi:

AQSh prezidenti Donald Tramp Gaagadagi Xalqaro jinoiy sud (XJS) tomonidan Isroil bosh vaziri Binyamin Netanyaxuni hibsga olish bo‘yicha order chiqarilgani sababli sudga qarshi sanksiyalar kiritish haqida farmon imzoladi. Bu haqda Deutsche Welle ma’lum qildi.

Trampning 6-fevral kuni imzolagan farmoniga ko‘ra, AQSh fuqarolari va ittifoqchilariga qarshi tergov olib borayotgan XJS rasmiylariga moliyaviy cheklovlar qo‘yiladi. Ularga AQSh vizasi taqiqlanadi, shuningdek, ularning oila a’zolari ham ushbu cheklovlarga duch keladi.

Tramp o‘z qarorini XJSning AQSh va Isroilga qarshi noqonuniy harakatlari bilan izohladi. Uning ta’kidlashicha, na AQSh, na Isroil XJS yurisdiktsiyasiga kirmaydi, shuning uchun sudning harakatlari Vashington suverenitetiga tajovuz va milliy xavfsizlikka tahdid soladi.

«O‘zaviatsiya» agentligi Malayziya, Janubiy Koreya va Misr aviakompaniyalariga O‘zbekistonga muntazam parvozlarni amalga oshirishga ruxsat berilganini e’lon qildi.

2025-yil 3-fevral kuni Malayziyaning Air Asia X Berhad aviakompaniyasi Kuala-Lumpur – Toshkent – Kuala-Lumpur yo‘nalishida muntazam qatnovlarni amalga oshirish uchun ruxsatnoma oldi. Ushbu parvozlar O‘zbekiston va Malayziya o‘rtasidagi hukumatlararo havo qatnovi bitimi asosida yo‘lga qo‘yiladi.

Shuningdek, Janubiy Koreyaning T’way Air aviakompaniyasiga Seul – Toshkent – Seul yo‘nalishida muntazam parvozlarni amalga oshirish uchun ruxsat berildi. Bu ham O‘zbekiston va Koreya Respublikasi o‘rtasidagi hukumatlararo kelishuv asosida amalga oshirildi.

Mazkur ikkala aviakompaniya o‘z parvozlarini Airbus A330 samolyotlarida bajarishi belgilangan.

4-fevral kuni esa Misrning Red Sea...

Samsung kompaniyasi o‘zining yangi flagmani Galaxy S25 Ultra bilan tezlik borasida iPhone’dan ustun kelishga muvaffaq bo‘ldi. PhoneBuff kanali ekspertlari tomonidan o‘tkazilgan sinovlar natijasida Galaxy S25 Ultra tezkor ishlash bo‘yicha iPhone 16 Pro Max’ni ortda qoldirgani aniqlandi.

Uzoq yillar davomida Apple va Samsung flagmanlari tezlik bo‘yicha deyarli teng kurash olib bordi. Biroq Snapdragon 8 Elite protsessori bilan jihozlangan Galaxy S25 Ultra ushbu an’anani buzdi va raqobatchisidan oldinga o‘tishga erishdi.

Galaxy S25 Ultra testni 3 daqiqa 7 soniyada yakunladi, iPhone 16 Pro Max esa 3 daqiqa 21 soniyada bajardi. Natijaga ko‘ra, Samsung flagmani 7 foizga tezroq ishladi.

Samsung ko‘p vazifalarni bajarishda...

Chevrolet kompaniyasi Trailblazer 2026 modelini yangiladi va uni 2025-yil bahorida sotuvga chiqarishni rejalashtirmoqda. Yangilangan model 2025-yilgi versiyaning asosiy xususiyatlarini saqlab qolgan holda, bir nechta yangi imkoniyatlarga ega bo‘ladi. Bu haqda speed.ru nashri ma’lum qildi.

General Motors (GM) ma’lumotlariga ko‘ra, Chevrolet Trailblazer 2026 modeli ishlab chiqarilishi 2025-yil 1-apreldan boshlanadi. Dilerlar esa ushbu yangilangan modelga buyurtma berishni 2025-yil 13-fevraldan boshlaydi.

Yangi modelda avvalgi Nitro Yellow Metallic va Crimson Metallic ranglari o‘rniga White Sands va Apex Red ranglari taqdim etiladi.

Chevrolet Trailblazer 2026 ikkita turbo dvigatel bilan ishlab chiqariladi:
🔹 1,2L I3 LBP (137 ot kuchi, 162 Nm) – E85 yonilg‘isini qo‘llab-quvvatlaydi;
🔹 1,3L...

«Hududiy elektr tarmoqlari» AJ va tizim tarkibidagi korxonalarda Komplayens nazorat tuzilmalari tomonidan amalga oshirilgan tadbirlar davomida bir qator yoqilg‘i-energiya resurslarini talon-toroj qilish holatlari aniqlandi. Bu haqda «Hududiy elektr tarmoqlari» AJ ma’lum qildi.

Ushbu tadbirlar ko‘lamida elektr energiyasidan noqonuniy foydalanish holatlarini bartaraf etish va ularga nisbatan zarur choralar ko‘rish maqsadida harakatlar olib borilmoqda.

Joriy yilning yanvar oyida Komplayens nazorat xizmati tomonidan o‘tkazilgan reyd tadbirlari natijasida 17 411,3 mln so‘mlik, ya’ni 10 051 619 ming kVt.soat elektr energiyasidan qonunga xilof ravishda foydalanish holati aniqlandi. Bu qonunbuzarliklar yuzasidan to‘plangan materiallar qayta hisob-kitob qilinib, tegishli hujjatlar huquqni muhofaza qiluvchi organlarga yuborildi.

Eslatib o‘tamiz...

O‘zbekiston Madaniyat va san’atni rivojlantirish jamg‘armasi tomonidan tashkil etilayotgan ilk sammit 2025-yil 4 – 6-aprel kunlari Nukusda bo‘lib o‘tadi. Bu haqda jamg‘arma vakillari Kursiv Uzbekistan nashriga ma’lum qildi.

Unga ko‘ra, har 18 oyda bir marotaba o‘tkaziladigan ushbu tadbir Qoraqalpog‘istonning barqaror rivojlanishi uchun xalqaro va mahalliy rassomlar, olimlar va faollarni jamlab, ekologik va madaniy muammolarga yechim izlashni maqsad qilgan.

Ma’lumot uchun, Orol madaniyat sammiti – Orolbo‘yi mintaqasini san’at, madaniyat, dizayn va ilm-fan orqali ijtimoiy hamda ekologik jihatdan o‘zgartirishga qaratilgan yangi tashabbusdir.

Eslatib o‘tamiz, avvalroq Ozodbek Nazarbekovga «Qirg‘iz Respublikasi xalq artisti» faxriy unvoni taqdim etilgani haqida yozgan edik.

O‘zbekiston bo‘ylab bugun havo biroz bulutli bo‘ladi, yog‘ingarchilik kutilmaydi. Bu haqda «O‘zgidromet» agentligi ma’lum qildi.

Toshkent shahrida shamol sharqdan 3-8 m/s tezlikda esadi, harorat kechasi 2-4° iliq, kunduzi 14-16° iliq bo‘ladi.

Qoraqalpog‘iston Respublikasi va Xorazm viloyatida shamol sharqdan 7-12 m/s tezlikda esadi, ba’zi joylarda 15-20 m/s gacha kuchayishi mumkin, harorat kechasi 2-7° sovuq, kunduzi 2-7° iliq bo‘ladi.

Buxoro va Navoiy viloyatlarida ham shamol kuchayishi kuzatiladi, kechasi 2-7° iliq, kunduzi 14-19° iliq bo‘ladi.

Toshkent, Samarqand, Sirdaryo va Jizzax viloyatlarida ayrim joylarga tuman tushishi mumkin, shamol sharqdan 7-12 m/s tezlikda esadi, kechasi 0-5° iliq, kunduzi 13-18° iliq bo‘ladi...

Qirg‘izistonda familiya va otalik ismini an’anaviy yozish bo‘yicha qonun loyihasi ma’qullandi. Bu haqda Qirg‘iziston parlamenti matbuot xizmati ma’lum qildi.

Qonun loyihasi tashabbuskorlari hujjat mamlakatning an’ana va madaniy xususiyatlariga mos ravishda familiya tanlash imkoniyatlarini kengaytirishini ta’kidladilar. Shu bilan birga, ushbu o‘zgarishlar -ov, -ev, -vich, -vna va shunga o‘xshash qo‘shimchalar bilan yozilgan familiyalarning huquqiy maqomi va yozilish tartibiga ta’sir qilmaydi.

Qonun loyihasida an’anaviy familiyalarni shakllantirishning uchta varianti taklif etilgan. Birinchi variantga ko‘ra, familiya sifatida boboning ismi qo‘shimchasiz olinadi, otaning ismi esa bolaning jinsiga qarab «uulu» yoki «qizi» qo‘shimchasi bilan yoziladi.

Ikkinchi variantda boboning ismi -tegi qo‘shimchasi bilan yoziladi, otaning ismi esa...

Toshkentda O‘zbekiston Adliya vaziri Akbar Toshqulov va Shveysariyaning O‘zbekistondagi elchisi Konstantin Obolenskiy «Musodara qilingan aktivlarni taqsimlash to‘g‘risidagi bitim»ni imzoladi. Bu haqda O‘zA ma’lum qildi.

Unga ko‘ra, ushbu kelishuv doirasida O‘zbekistonga $182 mln qaytarilishi belgilandi.

Bu mablag‘lar 2012-yilda Shveysariya Bosh prokuraturasi tomonidan G. Karimovaga nisbatan qo‘zg‘atilgan ish doirasida musodara qilingan. Ular BMTning «Uzbekistan Vision 2030 Fondi» orqali mamlakatga qaytarilib, sog‘liqni saqlash va ta’lim sohalariga yo‘naltiriladi.

Avvalroq, 2022-yil avgustda imzolangan birinchi bitim doirasida $131 mln O‘zbekistonga qaytarilishi belgilangan edi. Yangi bitim bilan jami qaytariladigan mablag‘ miqdori $313 mlnga yetdi.

Eslatib o‘tamiz, avvalroq kripto aktivlar faoliyatini litsenziyalash narxlari belgilangan edi.