Kia 2024- va 2025-yillardagi deyarli 74,5 mingta Sorento avtomobilini kuzovni boshqarish (BDC) dasturiy ta’minotidagi xato tufayli ommaviy chaqirib olishni e’lon qildi. Ushbu nosozlik faralar va orqa chiroqlarning ishlamay qolishiga olib kelishi mumkin. Bu haqida 32 cars nashri ma’lum qildi.
Nosozlik nafaqat standart modellarga, balki gibrid va plagin gibrid modellariga ham ta’sir ko‘rsatadi. Xususan, 63,8 ming avtomobil an’anaviy ichki yonuv dvigateli bilan jihozlangan, qolganlari esa gibrid elektr stansiyalari bilan ta’minlangan.
Kia ushbu muammoni hal qilish uchun vakolatli dilerlik markazlarida BDC blokining dasturiy ta’minotini yangilashni taklif qilmoqda. Avtomobil egalari ta’mirlashni mutlaqo bepul amalga oshirishi mumkin.
Mazkur chaqirib olish harakati avtomobil xavfsizligini ta’minlash va foydalanishdagi noqulayliklarni bartaraf etishga qaratilgan.
Avvalroq Kursiv Uzbekistan Kia rekord natijaga erishgani, Sportage va EV9 AQShda bestsellerga aylangani haqida xabar bergan edi.
