Volkswagen Xitoyda yangi marketing strategiyasini boshladi: kompaniya uchta SUV modeli – Volkswagen Tharu, Tiguan L Pro va Teramont Pro uchun umr bo‘yi kafolat taklif qilmoqda. Bu haqda IT Home nashri ma’lum qildi.
Unga ko‘ra, bu kafolat avtomobilning turli qismlarini, jumladan, dvigatel, uzatmalar qutisi, osma tizimi va boshqaruv tizimini qamrab oladi. Eng muhimi, kafolat vaqt yoki yurgan masofaga bog‘liq emas, ya’ni xaridorlar mashinalarini uzoq muddat davomida xavfsiz ishlatishlari mumkin.
Kafolat faqat birinchi xaridorlar uchun amal qiladi, ya’ni avtomobilni 30-aprelga qadar sotib olganlar uchun, shuningdek, mashinani faqat rasmiy dilerlarda xizmat ko‘rsatilishi kerak. Xitoyda umr bo‘yi kafolat berish amaliyoti odatda yangi modellarning chiqarilishida bonus sifatida beriladi, lekin Volkswagen bu safar barcha SUV modellari uchun bu kafolatni taklif qilmoqda.
Eslatib o‘tamiz, avvalroq Volkswagen Sagitar modelini taqdim etgan edi.
