Apple kompaniyasi tomonidan taqdim etilgan iPhone 17 Pro Max smartfoni bir qator yangi imkoniyatlarga ega. Ushbu maqolada modelning texnik xususiyatlari, imkoniyatlari va dizayni haqida so‘z boradi.
Ushbu maqolada quyidagilarni bilib olasiz:
Modelning texnik xususiyatlari
17 Pro Max Apple’ning yangi A19 Pro chipida ishlaydi. Qurilma 6 yadroli protsessor, 6 yadroli grafik blok va sun’iy intellekt uchun 16 yadroli Neural Engine tizimi bilan jihozlangan. Smartfon 12 GB operativ xotiraga ega bo‘lib, doimiy xotira hajmi 256 GB, 512 GB, 1 TB va ilk bor 2 TB variantlarda taqdim etiladi. 6,9 dyuymli ProMotion XDR OLED ekrani 2868×1320 pikselli va 120 Hz yangilanish tezligiga ega.
Kameralar tizimi uch moduldan iborat: 48 megapikselli asosiy, 48 megapikselli 4× telefoto va 48 megapikselli ultra-keng obyektiv, ular 4K formatida 120 kadr/soniya tezlikda video yozishi mumkin. Old kamera 18 megapikselli bo‘lib, 4K 60 kadr/soniyada suratga oladi. Akkumulyator hajmi taxminan 5088 mA/soat bo‘lib, qurilma IP68 himoyasiga ega va MagSafe texnologiyasini qo‘llab-quvvatlaydi. Operatsion tizim sifatida esa iOS 26 o‘rnatilgan.
Smartfonning dizayni
Apple bu yil dizaynda jiddiy o‘zgarish kiritdi. Kamera bloklari endi deyarli butun orqa qopqoqni egallagan. Pastki qismda yangi keramika qoplama bor. Rangi ham yangilandi — «kosmik to‘q sariq» modeli tanlab ko‘rilgan. Fikrlar turlicha: kimdir uni original deb baholadi, kimdir esa jozibali emas dedi.
Apple titandan yana alyuminiyga qaytdi, bu esa qurilmaning issiqlikni tarqatishini yaxshilaydi, ammo vaznini oshirdi. Telefon qo‘lda jiddiy va og‘irroq seziladi, ammo silliq qirralari uni qulayroq ushlash imkonini beradi.
Ekran va kamera tizimi
Displey avvalgi modelga nisbatan o‘zgarmagan, lekin hamon juda yuqori sifatli. 6,9 dyuym OLED panel HDR rejimida 1500 nitgacha, pikda esa 3000 nit yorqinlikka chiqadi. Anti-blik qoplamasi tufayli quyosh ostida ham o‘qish qulay. Avtoyoritish tizimi sezgir ishlaydi, rang qamrovi Display P3 standartida, ranglar tabiiy va to‘yingan.
Yangi ProFusion tizimi uchta 48 MP sensorni birlashtiradi. Keng burchak, telefoto va ultra-keng obyektivlarning har biri yuqori aniqlikda suratga oladi. Video 4K 120 fps darajasiga chiqdi. Old kamera ham 18 MP bo‘lib, sifatli videokonferensiya uchun moslashtirilgan.
Foydalanish imkoniyatlari
A19 Pro chipi unumdorlikda yuqori ko‘rsatkichlarni beradi. 17 Pro Max grafik va sun’iy intellekt vazifalarini tez bajaradi. Biroq real testlarda (masalan, PhoneBuff’ning Galaxy S25 Ultra bilan solishtiruvlarida) u ba’zi vazifalarda raqibdan orqada qolgan. Shunga qaramay, oddiy foydalanuvchilar uchun tezlik farqi sezilmasligi mumkin.
Zaryadlash
Akkumulyator hajmi oshirilgan. Bu telefonni kunlik ishlatishda ancha barqaror qiladi. Zaryadlash USB-C orqali tezkor, MagSafe orqali esa 25 Vtgacha quvvat olish mumkin.
Qadoqlash minimalist bo‘lib qolgan. Yangi model kichik quti, ichida USB-C kabeli va bitta hujjatgina bilan taqdim etiladi. SIM kartani chiqarish uchun kalit ham yo‘q, chunki eSIM ishlatiladi.
Eslatib o‘tamiz, Kursiv Uzbekistan 2025-yilning kuz mavsumi uchun eng yaxshi 5 ta smartfon haqida yozgan edi.
