ZTE kompaniyasi yaqin kunlarda bir vaqtning o‘zida ikki xil form-faktordagi bukiladigan smartfonlarni taqdim etishga hozirlanmoqda. Bu haqda GSMArena xabar bermoqda.
Nubia Flip3
Renderlarda Flip3 modeli oldingi — Flip2’dan sezilarli farq qiladi. Qurilmada butun tashqi qopqoqni egallagan katta ekran bo‘ladi va unda kamera uchun kesmalar joylashtirilgan. Bunday dizayn yechimi hozir Samsung va Motorola’ning yangi smartfonlarida ham qo‘llanmoqda. Avvalgi Flip2’da tashqi displey ancha kichik edi. Flip3’dagi o‘zgarish asosiy yangiliklardan biri.
Nubia Fold
Nubia Fold dizayni kompaniyaning boshqa ZTE va Nubia seriyasidagi modellari uslubiga yaqin. Ichki displey deyarli kvadrat shaklda bo‘ladi, orqa panelda esa uchlik asosiy kamera ko‘rinmoqda. Ammo texnik tavsiflar hozircha oshkor qilinmagan.
Narx va avvalgi model haqida
Oldingi bukiladigan model o‘zining nisbatan past boshlang‘ich narxi (700 yevro) bilan ajralib turgan edi. Qurilma MediaTek Dimensity 7300X chipiga asoslangan bo‘lib, o‘rta segment uchun yaxshi ko‘rsatkichlarga ega edi. Yangilangan Flip3 kamida shu darajada bo‘lishi, ehtimol undan ham kuchliroq bo‘lishi kutilmoqda.
ZTE yaqin orada ikki yangi bukiladigan smartfonini rasman taqdim etishi rejalashtirilmoqda. Rasmiy taqdimotda texnik xususiyatlar va narxlar ma’lum bo‘ladi.
Eslatib o‘tamiz, Kursiv Uzbekistan Nubia Z80 Ultra global bozorga 650 dollar narx bilan chiqarilgani haqida yozgan edi.
